UMongameli Mugabe uze wahlangana lenkokheli yamacele womabili eMDC uMnu Arthur Mutambara loMnu Morgan Tsvangirai ngolweSine bekhuluma ngodaba lokwabelana izikhundla zedale labaphathintambo, i Cabinet.
Kodwa isikhulumi seMDC ekhokhelwa nguTsvangirai, uMnu Nelson Chamisa utshele iStudio 7 ukuthi, lumhlangano awuhambanga kuhle ngoba kube lokungavumelani phezu kodaba lokuthi yiliphi ibandla elizathatha ziphi izikhundla.
Isiqokoqela sokungavumelani emhlanganweni wangolweSine sibikwa sibephezu kwengatsha ezine eziqakathekileyo embusweni.
I Zanu PF ifuna ugatsha lwezomvikela, olubona ngezemali, olwendaba zaphakathi kwelizwe, kanye lolombuso wezabelo. Ngakwelinye icele, icele leMDC elikhokhelwa nguTsvangirai lalo lithi lifuna lezingatsha zibe sezandleni zalo.
Ngalokhu, uChamisa uthi udaba lolu solubuyiselwe kumaqula amabandla la, ayiwo asungule inkulumo ebezilawulwa nguMongameli Thabo Mbeki wakwele South Africa. UMnu Mutambara yena utshele iStudio 7 ukuthi laloba kube lokungavumelani phezu kwengatsha ezithize, bavumelene entweni ezinengi.
Idale leZanu PF Politburo libikwa lixwayise uMugabe ngolweSithathu ukuthi engalokothi avumele ingatsha lezi ziye kuMDC.
Ingcwethi ehlaziya ezombusazwe uMnu Mlamuli Nkomo utshele uNtungamili Nkomo weStudio 7 ukuthi ukungavumelani lokhu kuveza ukuthi uMongameli Mbeki, yena osengumlamula nkunzi kudaba lweSudan, utshiye engawufezanga umsebenzi wakhe.
UNtungamili Nkomo uphinde wakhuluma lesiphathamandla seZanu PF uMnu Joram Gumbo olandule ukuthi umhlangano weCentral Committee wangolweSithathu uxwayise uMugabe ukuthi engavumi ukuthi iMDC ithathe ingatsha eziqakathekileyo ku Cabinet.
Emhlanganweni lo uMugabe utshele iziphathamandla zebandla lakhe ukuthi kuyayangisa ukuthi sebengena kuhulumende munye leMDC. Iziphathamandla zeZanu PF zibikwa zisole uMugabe ngokuloba isivumelwano sikahulumende womanyano lo.
Kodwa yena uMugabe ubikwa
etshele lezi ziphathamandla ukuthi kumele zizisole ngokwehluleka ukunqoba
kukhetho lwedale lephalamemende hatshi ukuthi zisole yena.
Ezinye Indaba ZeStudio 7...
