Ukulobelana phansi isivumelwano sokubumba uhulumende phakathi kwenkokheli yeZanu PF leyeMDC ngolweSine sokwamukelwe ngenjabulo ngabantu abanengi abakhangelele ukuzalwa
kweZimbabwe entsha ejuluka uluju lochago.
Umkhosi omkhulu wokunanza lesi sivumelwano uzaqhutshelwa eHarare ngoMvulo njalo inkokheli yeAfrica jikelele ikhangelelwe ukuphatheka kulumkhosi.
Laloba okuqukethwe yisivumelwano lesi kulokhu kungakaziswa okusemthethweni, iStudio 7 iyakuveza ukuthi ibandla leZanu PF lizakwabelana umbuso ngokulingeneyo leMDC.
IZanu PF yona izathola izihlalo ezilitshumi lanhlanu kudale leCabinet, iMDC ekhokhelwa nguMnu Morgan Tsvangirai ithole ezilitshumi lantathu kuthi iMDC ekhokhelwa nguMnu Arthur Mutambara yona izathola ezintathu.
Kuzabunjwa isisekelo sombuso esitsha esigoqela imbono kazulu phakathi komnyaka owodwa lenyanga eziyisithupha. Ukuze uhulumende omutsha lo aqale ukusebenza kuzamele kuguqulwe isisekelo sombuso phansi kuka Ammendment # 19.
Lokhu kuzakwenziwa kunsuku ezimbalwa ezilandelayo. Isivumelwano lesi sithi osibalukhulu bezabelo kumele bakhethwe kutsha amacele womabili eMDC lawo athole izihlalo.
Kuzakuba njalo ledale elitsha
elibizwa ngokuthi yi Council of Ministers eliletha ndawonye amalunga eCabinet,
kumbe abaphathintambo.
Lelidale lizakhokhelwa nguTsvangirai yena ozathatha isikhundla sikaPrime Minister. Ngakwelinye icele uMongameli Mugabe uzakhokhela idale leCabinet. UTsvangirai njengo Prime Minister uzakhetha umsekeli oyedwa ovela kubandla lakhe kuthi umsekeli wakhe wesibili uzavela kuMDC kaMutambara.
Abasiki bebunda bathi ozasekela uTsvangirai evela kubandla lakhe nguNkosazana Thokozani Khupe kuthi uMutambara laye nguye ozakuba ngumsekeli wesibili. UMugabe yena uzaqhubeka elabasekeli bakhe ababili.
Abasiki bebunda bathi uhulumende lo uzabusa okweminyaka emihlanu. Isivumelwano esitsha lesi sithi ilunga ledale lephalamende kumbe eleSenate lingaxotshwa kubandla kumbe libhubhe, akusoze kwenziwe ukhetho lwe by-election.
Okuzakwenzakala yikuthi ibandla elivele libusa leso sigaba lizakhetha umuntu ozathatha leso sihlalo. Abakhokheli bamabandla womathathu bazahlangana kusasa behlela ukuthi ukubumba uhulumende.
UMnu Sam Sipepa Nkomo, olilunga leMDC ekaTsvangirai uthi bakhangelele ukuthi kube lokusebenzelana kuhle phakathi kwamabandla womathathu kulungisiswe udaba lweZimbabwe.
Umsekeli kanobhala jikelele weMDC kaMutambara, uNkosazana Priscillar Misihairambwi Mushonga yena uthi lokhu yikuzalwa kweZimbabwe entsha, kuthi uMnu Joram Gumbo, oyisiphathamandla seZanu PF uthi Ibandla lekhe lalo liyayikhwabitha iZimbabwe entsha esithi amazwe omhlaba kuzamele aphathise ekulungisiseni umnotho.
Kusenjalo, uBrenda Moyo weStudio 7 uxhume ingcwethi ezicubungula ezombusazwe uMnu Jethro Mpofu loMnu Rejoyce Ngwenya abathi uhulumende omutsha lo kuzamele asebenze gadalala ukuze kulungisiswe udaba lwezenotho.
