Ekuqhubekeni kokuwa kwamandla emali yeZimbabwe inengi lamabhizimusi labazithengiselayo sebefuna imbadalo ngemali yakwamanye amazwe.
Lanxa sekuthengiswa ngemali yamazwe afana leMelika leBotswana eyakwele South Africa, amaRands, yiyo ekhanya isidingakala kakhulu ngoba abantu bethenga izinto zokuthengisa emkambo wensitha eSouth africa.
Kodwa osekudanise abanengi yikuthi lanxa kuthengiswa ngemali yakwamanye amazwe intengo yezinto iqanse okwesabekayo.
Njenge sibonelo, idozen yamaqanda isithengwa ngamadola amane aweMelika khona eMelika amaqanda ayisilinganiso esifanayo ethengwa ngedola elilodwa.
Lokhu sekubangele ukuthi izisebenzi zikahulumende zithi sezifuna ukuhlawulwa ngamadola eMelika ukuze zizivikele ekonakaleni komnotho welizwe.
Owake wamela isigaba seHwange East edaleni lephalamende, uMnu Thembinkosi Sibindi utshele uChris Gande weStudio 7 ukuthi lanxa uhulumende engafuni ukuvuma ukuthi imali yakwamanye amazwe yiyo esisetshenziswa uhulumende uzithulele ngalokhu.
