Abasekeli bebandla leMDC abambalwa lozulu makhaza inengi kulizakhamizi zeglenview lemabvuku balimele okwesabekayo ngemva kokutshaywa ngabasakhulayo beZanu PF izolo lakuthange. Kubikwa kuqhamuke udlakela ngemva kokunqoba kukhetho lokudinga umlawuli wedale lephalamende.
UMnumzana Lovemore Moyo owecele leMDC kaTsvangirai nguye onqobe kulolukhetho. Omela iGlenview edaleni lephalamende, uMnu Paul Madzore utshele iStudio 7 ukuthi banengi abalimeleyo abatshaywe ngontanga bezanu pf laba. Amalunga edale lephalamende awe MDC abikwa esedlela evalweni osokubangele ukuthi abanye bacele uncedo lwamapholisa nxa besuka ezindlini zabo besiya emsebenzini.
Kubikwa kulokufuthelana eHarare phakathi kwabasekeli beZanu PF labe MDC kulandela ukuhozwa lokuhlekwa kukaMongameli Mugabe edaleni lephalande ngoLwesibili.
Kolunye udaba olufanayo amapholisa abikwa ecithe umhlangano womanyano weCrisis in Zimbabwe Coalition lapho kade kusenziwa ukhetho. UMnu. Mfundo Mlilo isikhulumi secombined Harare Residents’ Association obekhona laye emhlanganweni lo uchasisela uChris Gande weStudio 7 okwenzakeleyo.
