Udubo lokusilela kwamanzi edolobheni le Harare, osolubangele ukuqhamuka komkhuhlane we sihudo, lubikwa lokhu luqhubekela phambili.
Umkhuhlane wesihudo ubikwa wande ikakhulu emizini ehlala abanengi egoqela i Mbare, Glenview le Mabvuku, ngenxa yengcekeza ebangelwa yikusilela kwamanzi lokudubuka kwezititshi zesuweji.
Inengi lisola inkampani ye ZINWA, lisithi iyehluleka ukuqhuba kuhle umsebenzi wayo wokubona ukuthi abantu balamanzi eneleyo ahlanzekileyo okusebenzisa kodwa yona izinwa ithi iswela imithi yokugezisa amanzi.
UNkosazana Rudo Pikira, umgcinisihlalo ka Ward 3 eMbare, enhlanganisweni ye Combined Harare Residents Association, iCHRA, utshele uSithandekile Mhlanga we studio ukuthi umkhuhlane wesihudo ubhahile kulindawo njalo abagezisa izambuzi ezisetshenziswa nguzulu, bakhalala umsebenzi khona kungelamithi lempahla yokuzivikela abantu abangayisebenzisa ukuzenzela lumsebenzi.
USithandekile Mhlanga we studio 7, uphinde waxoxa loMnu. Thabani Zikhali, umgcinisihlalo ka ward 24 e Highfields, enhlanganisweni ye CHRA, othi umkhuhlane wesihudo ubungakafiki kulesisigaba kodwa isiphetho yikuthi ufike ngoba izititshi zesuweji zihlala zidubukile njalo lamanzi ayasilela kwezinye indawo.
