Uhulumende we South Africa uthi inkamba ezihlala abantu abathinteke kudlakela lwenkethabetshabi olusanda kudlula zizavalwa ngeviki ezayo abantu babuyiselwe lapho ababehlala khona.
Uthi usenikeze izizalwane zamazwe atshiyeneyo ezihlala enkambeni lezi, ezigoqela ezeZimbabwe, phose ezizinkulungwane eziyisikhombisa, -6 700, amaphetshana okuhlala kulelolizwe okwesikhatshana. Amaphetshana la avumela umuntu ukuthi ahlale kwele South Africa okwenyanga eziyisithupha.
Isikhulumi sogatsha olubona ngokwenzakala elizweni kwele South Africa, uNkosikazi Siobhan McCarthy utshele istudio 7 ukuthi abanye ababevele belamaphetshana okuhlala elizweni, abedlula amakhulu ayisithupha, balile ukuthatha amaphetshana la becabanga ukuthi azaphambanisa lawo abavele belawo.
Uthi ugatsha lwakhe lusabonisana lezigodlo zamazwe alababantu, bencedisana ukuthi abangalamaphepha aqondileyo bebuyiselwe emakhaya abo.
Kusenjalo, uMnu. Sibonile Mabhena, isizalwane se Zimbabwe esihlala kwezinye zalezi nkamba, uthi yena wamukele incwadi yokuhlala okwesikhatshana kodwa kaboni ukuthi engabuyela lapho ayehlala khona ngoba kusobala ukuthi inzondano yenkethabetshabi ayikaphela.
