Inhlanganiso ebona ngokuqhutshwa kokhetho elizweni iZimbabwe Electoral Commission (ZEC) ithi ukhetho luzaqhubeka ngoLwesihlanu kungelani lokuphuma kwebandla leMDC kulolukhetho.
I bandla leMDC lilobele iZEC incwadi izolo liyazisa ngenyathelo lalo lokuphuma kukhetho
ngoba lungasoze luqhutshwe ngokukhululekileyo. Ekhuluma lentathelizindaba
emhlanganweni awenze lamuhla, umgcinisihlalo weZEC uMnu George Chiweshe uveze
ukuthi akayinanzi ingcwadi yeMDC le ngoba esithi inyathelo lokuphuma kukhetho
lingekho emthethweni. Kodwa unobhala obona ngezaphakathi kwelizwe kulelibandla uMnu Sam Sipepa Nkomo uthi bona kabakungeni okwamadlwane eZEC leZanu PF.
Ngakwelinye icele, abasekeli beMDC laloba bejabulele inyathelo elithethwe lokuphuma kukhetho basele bedideke ingqondo ngokuthi kambe ingqubelaphambili iyini, kulembiko ethi ibandla leZanu PF likhanya lizabamba ngamandla abahlala ezigabeni zemaphandleli ukuthi bayevotela uMugabe.
Ingcwethi ecubungula ezombusazwe uMnu Jethro Mpofu ofundisa izifundo zokwethulwa kwemibiko eZimbabwe Open University utshele uBrenda Moyo weStudio 7 ukuthi laloba kuyisiphithiphithi kulungiselelwa ukhetho abantu abanengi kabasoze bayevota.
