Isikhonzi se United Nations, uMnu. Haile Menkerios ubikwa esefikile elizweni njalo ube lomhlangano lo mongameli Robert Mugabe lamuhla, becubungula okungenziwa ukuthi ukhetho oluzayo lube ngolukhululekileyo.
Ukuthunywa kwalesisikhonzi kuvunyelenwe phakathi kukamongameli Robert Mugabe lonobhala jikelele wenhlanganiso yomanyano wamazwe womhlaba iUnited Nations, uMnu Ban Ki Moon eceleni komhlangano wenhlanganiso le obuhlaziya ngezokudla emhlabeni jikelele, osanda kuphela eRome kwele Italy .
Inengi likhala ngokuthi udlakela olukhona elizweni luzabangela ukuthi ukhetho oluzayo lungabi ngolukhululekileyo.
UThamsanqa Mahlangu, ongumgcinisihlalo wabatsha kucele ele MDC elikhokhelwa nguMnu. Morgan Tsvangirai utshele uSithandekile Mhlanga we studio 7 ukuthi ibandla lakhe likubona kuliqhinga elihle ukuthi i UN ithumele isikhonzi kodwa akuthembisi ukuthi uMugabe angaguqula izenzo zakhe kungakafiki ukhetho.
Kunjalo-nje, uMnu. Busani Ncube, ingcwethi ecubungula ezombusazwe, utshele uSithandekile Mhlanga we studio 7 ukuthi inhlanganiso ye United Nations iphambanisa ngoku thumela izikhonzi kungaselasikhathi eseneleyo sokuthi kulungisiswe okuyabe kuhlupha elizweni.
