Umkhokheli wecele leMDC elithi lanqoba kukhetho lwenyanga edluleyo uMnu Morgan Tsvangirai uqhubekela phambili ebhoda ngamazwe omhlaba edinga usekelo lokuthi umongameli Robert Mugabe ethule impumela yokhetho lukamongameli.
Namhla uMnu Tsvangirai uhlangane lomongameli wakwele Ghana umnumzana John Kuffor. Izolo wahlangana lonobhala jikelele womanyano weUnited Nations (UN) uMnu Ban Ki-Moon eGhana. Uhlangane njalo lowake waba ngumongameli wele Nigeria uMnu Olusegun Obasanjo.
UMnu Tsvangirai wazisa abakwamanye amazwe ngesimo esiselizweni ekhuthaza ukuthi lawa mazwe angenele kudaba lokungethulwa kwempumela yokhetho.
Emhlanganweni loMnu Ban uMnu Tsvangirai uthe uMugabe kumele akhuthazwe ukusuka embusweni ngokuthula. Ingcwethi ecubungula ezombusazwe uMnu Zenzo Nkomo utshele uBrenda Moyo weStudio7 ukuthi okwenziwa nguMnu Tsvangirai kuhle kakhulu njalo kuyancomeka ngoba amazwe la elakho ukupha eleZimbabwe usekelo ngesikhathi sobunzima elikiso.