Kukhetho oludlulileyo inengi belikhangelele ukuthi ozanqoba phakathi kwebandla le ZANU PF lele MDC ngubani kodwa kukhetho oluzayo kuzaba ngokwakuqala ezigabeni ezinengi zelizwe, ukuthi amalunga amacele womabili ancintisane, lokhe lelo bandla lidabuke phakathi.
Amalunga amacele womabili azancintisa eMagwegwe ko Bulwayo nguMnu Fletcher Dulini Ncube, owecele elikhokhelwa nguMnu. Arthur Mutambara lo Mnu. Felix Magalela Mafa Sibanda, obona ngokwethulwa kwembiko esigabeni sako Bulawayo, ekucele elikhokhelwa nguMnu. Morgan Tsvangirai.
Abanye abancintisayo labo ngu Nkosikazi Molly Ndlovu we ZANU PF, uBekezela Ndlovu ozimeleyo lo Mnu. Mpendulo Manga we United People’s Party. UMnu Dulini Ncube, utshele uSithandekile Mhlanga we studio 7 ukuthi uzanqoba kukhetho oluzayo ngoba evele eselolwazi lokusebenzelana labantu bakulesisigaba.
Kunjalo-nje, uMnu. Felix Magalela Mafa Sibanda, oncintisa efuna isikhundla sinye, ekucele le MDC elikhokhelwa nguMnu. Morgan Tsvangirai uthi umsebenzi wakhe kunhlanganiso ezilwela amalungelo abantu ezigoqela i Post Independence Survivors’ Trust le National Constitutional Assembly sezamlungiselela ukusebenza labantu njalo kusobala ukuthi uzanqoba.