Izizalwane zezimbabwe ezihlala endaweni engelamvumo yekhansili eMooiplaas duze ledolobho lePretoria sebethese izigelekeqe ezaziwayo ezivela koMaranda eMasvingo, umlandu wokubangela ukulwisana kwangempalaviki okwenze abanye babaleka emikukwini yabo kwatshiya amaZimbabwe angamakhulu amane engelamakhaya.
Lokhu kulwisana kuqale ngemva kokuba iqula lamasela lelo lintshotshe kwelinye ivinkili elincane letuckshop latshiya liyitshisile kwase kusithi abantshotshelweyo layo abazalwa kwele South Africa baphindisela ngokutshisa imikhukhu yamasela lawo kwagoqela labanye abangelacala. Imithombo ethembekile yalile ukuthi ukulwisana lokhu bekuxumene lokucwasana ngobuzwe. Indawo yeMooiplaas ihlala imihlobo etshiyeneyo yezizalwane zakwele South Africa kanye labavela eZimbabwe.
Lobanje yaziwa njengendawo abantu abahlala bethokozile lamhlanje ibithule kakhulu kukhombisa ukuthi abantu basethukile ngokulwa lokutshiswa kwemikhukhu ngempalaviki. Kubikwa iqula lamasela avela eMaranda eMasvingo beselilesikhathi lintshontshela, ukutshaya lokubulala abantu kule indawo. UMnu Tryagain Ngowane ohlala kule indawo edabuka eBikita uthi ngolwesihlanu amaselala antshontshe kwenye ituckshop yamaVenda akwele South Africa atshiya eyitshisile. Kwathike ngomgqibelo ekuseni abantshontshelweyo baqoqana batshisa imikhukhu ehlala amasela lawo emihlalo.
Uthi baphinda baphenduka njalo ntambama sebefika amakhulu amathathu batshisa eminye engamatshumi amabili abacabangela ukuthi kuhlala khona lawo masela. Uthike lokhu yikho okwenze ukuthi kutshe lemikhukhu yamazimbabwe angela cala.
