Amalunga ekhomidi ebona ngokuthengiselana lokuhlelwa kwentengo, agoqela amapholisa, amasotsha, abamajele labasakhulayo beZanu PF babikwa sebeqalise ukungena emupulazini lapho abathi intengo yezifuyo lezilimo yehliswse. Limbiko iza amapholisa esithi asebophe osobhizimusi abedlula inkulungwane ezine phansi kohlelo lokwehlisa intengo ukuze ibuyele kulokhu eyayiyikho khona umhlaka 18 Nhlangula engakafiki.
Abalimi abafuye inkomo babikwa bebanjwe ngamandla ukuthi behlise intengo yenkomo kuthi labo abalezivande babikwa bebanjwa ngamandla ukuthi behlise intengo yezilimo zabo. Kodwa iphephandaba lebulenjini, iZimonline, lithi umphathintambo wezokuthengiselana uMnumzana Obert Mpofu uthi uhulumende usekhathazwa yikusilela kwezinto ezitolo. Lokhu ngokwakuqala ukuthi uhulumende avume ukuthi uhlelo lwakhe lokwehlisa intengo luza liphutha. Incwethi kwezokulima, uMnumzana Mandla Nkomo utshele uChris Gande weStudio 7 okunengi ngohlelo lolu emapulazini.