Uhulumende we Zimbabwe uthi uhlelo lokwehliswa kwentengo luphumelele kakhulu ngoba uzulu enelise ukuthola izinto ezimqoka empilweni ngentengo ephansi. Kodwa ingcwethi kwezombusazwe zithi uhlelo lukahulumende lolu aluphumelelanga ngoba izinto zingasatholakali ezitolo.
Unobhala webandla le ZANU PF kwezokwethulwa kwemibiko uMnumzana Nathan Shamuyarira uthi emhlanganweni we Politburo owenziwe izolo kuvunyelwene ukuthi uhlelo lweDzikisai mitengo luqhubekele phambili. Kodwa ngakwelinye icele ibandla leli liyavuma ukuthi elizweni sokulobunzima kwezomnotho kodwa lilandula ukuthi yilo elidale ukubhidlika komnotho, lisethesa lumlandu emazweni aphetsheya afana lele Melika lele Bhilithane.
I Studio 7 ikhulume lelunga le ZANU PF Politburo owake waba ngu Mayor wedolobho lako Bulawayo uMnumzana Joshua Malinga ochasisa umbono wakhe ngokwenzakala elizweni.