Inengi lababalisi liqalisile ukukhalala umsebenzi okugcweleyo lamuhla, njengendlela yokuzama ukubamba ngamandla uhulumende ukuthi abengezelele iholo, abalithi liphansi kakhulu.
Isikhulumi senhlanganiso yababalisi eye Progressive Teachers Union of Zimbabwe, i PTUZ, uMnumzana Brightmore Busani Mbanjwa utshele iStudio7 ukuthi ababalisi abayi fundisa emaklasini, kodwa bazihlalele nje emahofisini abo, njalo amapholisa ayabhoda-bhoda ezikolo engena emahofisini ebuzisisa ngokungasebenzi kwabo lokhu, kodwa akukabi lokuhlukuluzwa.
UMbanjwa uphinde wasola enye nhlanganiso yababalisi, i Zimbabwe Teachers Association, iZIMTA ngokungamanyani labo kulokhu kukhalala umsebenzi, kungxoxo ayenze loSithandekile Mhlanga owe Studio 7.
Kodwa, isiphathamandla senhlanganiso ye ZIMTA, uMnumzana Richard Gundane sitshele u Sithandekile Mhlanga we Studio 7 ukuthi inhlanganiso yakhe layo kayithokozi ngeholo ababalisi abalitholayo, ngakho izahlangana lohulumende kuyonale iviki, lapho ezamnika khona izikhalazo zayo, andubana ikhulumisane lamalunga ayo ukuthi bengathatha nyathelo bani.