Abathengisa emkambo wempahla ezehlukeneyo owe Unity Village Flea Market koBulawayo ovalwe ngoMvulo lugatsha lukahulumende olweZIMRA, lusithi lusadingisisa ukuthi abanini bamabhizimusi abakule indawo babhadele imthelo efaneleyo, bathi sebekhalaze kuhulumende ukuthi beqhubeke ngomsebenzi kusahlolisiswa.
Asenelisanga ukukhulumisana lohulumende ngaloludaba kodwa uMnu. Dumisani Ncube, umgcinisihlalo wekhomithi yogatsha oluxwayisa uhulumende labamabhizimusi asathuthukayo eye SME’s Advisory Council, uthi basamelele impendulo evela kugatsha lwe SME’s lolwe ZIMRA ngaloludaba.
UMnu. Ncube uthi amavinkili ayisitshiyagalombili avaliwe koBulawayo njalo umkambo owe Mutize Flea Market, owatshiswa ngumlilo ngenyanga kaNcwabakazi nyakenye, uvalwe kumaviki amathathu edluleyo ngesizathu esifanayo.
UMnu. Ncube uthi lokhu sokubangele ukuthi abanini bamabhizimusi balahlekelwe yinzuzo, njalo abanye babethole imali emabhanga eyama bank loans, okuzabangela ukuthi kube lukhuni ukuyibuyisela nxa bengasebenzi.
Uqhubeke wathi isandla sikahulumende sibonakala engani silukhuni kumabhizimusi asedolobheni lakoBulawayo kulezinye indawo.
Kodwa uMnu. Ncube uthi basebenza kuhle lezinye iziphathamandla zikahulumende ezigoqela ugatsha lweZIMRA, oNkosikazi Monica Mutsvangwa loJudith Ncube labanye ababendla leZANU PF, ikakhulu koBulawayo, ngaloludaba.
Forum