Sihlaziya umculo kaNyonemnyama-Umlandi Wetshitshi othi “uDakamela Wamawaba,” osanda ukuwethula ekhatshwe zimbongi uBuqilibentethe loMgubazi. Ingoma le yethulwe phambilini komcimbi okhangelelwe ukuqhutshwa mhlaka 4 ngoMqibelo kusiya ku 5 ngeSonto oweMiklomelo yenduna uChief Mbusi Dakamela, ngenyanga ezayo ekaMabasa khonale koDakamela eNkayi.
UBuqilibentethe nguChristopher Nkosana Ncube weKezi eMaphisa, okuqembu le Insukamini, othi uthola ugqozi ngokuthanda amasiko. Uchasisa ngamazwi akhe akulo umculo lokuqakatheka kwemiklomelo.
UMlandi Wetshitshi, nguAntony Tshuma, weNkayi koChief Madliwa, yena othi umculo othi “uDakamela Wamawaba” ulandisa kusukela kuDakamela wasekuqaleni (owayeyinduna ngaphansi kombuso wenkosi uMzilikazi lenkosi uLobengula, njalo owayehola ibutho leBabambeni) kusiya kowalamuhla. Uthi uChief Dakamela wenelisile "ukubamba insimbi etshisayo, wakhwela intaba, walubamba ugodo, kusukela kusesenzima kodwa sokuze kusiba ngcono," ngale imiklomelo, okungamazwi akule ingoma.
UMgubazi, nguLizwi Mkhululi Ngqabutho Tshuma weTsholotsho koChief Hadebe njalo uchasisa ngesihloko sengoma esithi uDakamela Wamawaba. Uthi aMawaba kwakulibutho leNkosi uLobengula elalibonakala ngezihlangu ezilombala omhlophe lomnyama, kukanti iwaba yinkomo enduna kuthi ensikazi ibe liwasakazi (Ngakho nguDakamela Wamawaba ngoba induna zazingezenkosi).
Abathathu laba bagxile eSouth Africa njalo bathi umculo lo utholakala ebulenjini ku You Tube ngaphansi kwebizo elithi Mr Gold Tshuma.
Ukulalela umculo othi UDakamela Wamawaba ngokugcweleyo:
https://youtu.be/B1f5UTvEPPc?si=ihz1UqGPmAocsW-N
UMlandi Wetshitshi uthi bayatholakala njalo ku e-mail ethi antonygold182@gmail.com lakunombolo zeSouth Africa ezithi 27/738773336.
UMlandi Wetshisi uke wahlabela njalo ngemiklomelo edluleyo, kungoma ethi Emlandweni :
https://youtu.be/3-lZqh5K074?si=11ROWq9-WBcrIg7j
lethi koDakamela
https://youtu.be/rnpu2CyjcNQ?si=SQqxrkJRUbYCzFK9
Inengi labaphatheka kwezokuzithokozisa lithi alitholi inzuzo ngalokhu elikwenzayo njalo liphatheka ngoba kulubizo kanye lokuthuthukisa amasiko.
Kusenjalo induna uChief Dakamela weNkayi uncome uBuqilibentethe, uMlandi Wetshitshi, uMgubazi lazo zonke imbongi, abaculi, labanye abasabalalisa imbiko elondoloza amasiko ngendlela ezehlukeneyo.
“Ngitsho bonke, hayi abahaya uChief Dakamela kuphela kodwa bonke abenza okuhle…langendlela yokulondoloza ihistory…i oral tradition iqakathekile ekwakheni isizwe….” kutsho uChief Dakamela.
Uqhubeke wathi balokhe besalolonga amalungiselelo emiklomelo:
“Sisakhulumisana lama companies, lama sponsors, labo bonke abafuna ukuphathisa ngoba yibo who can make it work…isiyehlukile kulakuqala imiklomelo ngakho kunengi okudingakalayo," kugqiba u Chief Dakamela.
Forum