Kweziphathelane labesifazana, sixoxa loNkosazana Agnes Munsaka ofungiswe ngoLwesine olwedluleyo ukuthi asungule umsebenzi wokuba ngukhansila edolobheni lakoBulawayo, kuhlandla lokunanza amathuba okuthuthukisa abesifazana ele proportional representation.
UNkosazana Munsaka, odabuka eBinga, okubandla leCCC, njalo ongumunye wabasungula ibandla leMDC ngo1999, uchasisa ngohambo lwakhe, langomsebenzi akhangelele ukuwenza njengokhansila.
Kusenjalo, eleZimbabwe lamuhla linanze ilanga lokulondoloza amalungelo abesifazana emhlabeni jikelele eleInternational Women’s Day eMunyarari Primary School eZimunya eMutare ngoLwesihlanu, lapho umphathintambo kahulumende ohola ugatsha lwabesifazana, uNkosikazi Monica Mutsvangwa akhuthaze abesifazana ukuthi bezithuthukise.
Amaphephandaba kahulumende athi uNkosikazi Mutsvangwa uthi kufanele abesifazana bangene emisebenzini efana lezokwemba lapho okulabesilisa khona njalo baqakathekise imfundo yabo leyamantombazana.
Ilanga leli, elabekwa ngumanyano weUnited Nations, linanzwa ngokusemthethweni ngoMgqibelo njalo indikimba ithi “For All Women and Girls: Rights. Equality. Empowerment,” okuyinjongo yokukhuphula amalungelo abesifazana lamantombazana, ukulinganisa amathuba, lokuthuthukisa impilo zabo.
Siphinde saxoxa loNkosazana Munsaka, yena othi iproportional representation ngelinye inyathelo elimqoka ekuthuthukiseni amathuba abesifazana.
Forum