Umhlangano oqhutshwe eWhite House ngoLwesihlanu phakathi kuka Mongameli Donald Trump weMelika loMongameli Volodymyr Zelenskyy we-Ukraine, obuhlose ukubumba isivumelwano esipha eleMelika ilungelo lokwemba amatshe aligugu eUkraine, ucine usiba lokuphikisana okukhulu phakathi kwabakhokheli ababili laba. Iwofisi kaMongameli Trump yazise ukuthi isivumelwano lesi asisasayinwanga. Intathelizindaba yeVOA uPatsy Widakuswara usipha loludaba.
"Awusoze unqobe. Awusoze unqobe lapha. Ulethuba lokuphumelela ngenxa yethu."
Kube lokuxabana okukhulu ewofisini kamongameli weleMelika phakathi kukaTrump loZelenskyy.
“Awula mandla lapha … (cross talk with Zelenskyy). Udlala ngempilo yezigidi lezigidi zabantu. Udlala ngempi yamazwe omhlaba eyesithathu i-World War III,” kutsho umongameli Trump.
UTrump uxwayise uZelenskyy ukuthi asayine isivumelwano esizakupha eleMelika imvumo yokwemba amatshe aligugu e-Ukraine njengembadalo yosekelo lwayo empini yelizwe leli leleRussia.
“Nxa ungasayinanga isivumelwano lesi kutsho ukuthi thina asisayingeni lindaba.”
Kumbiko wakhe enkundleni yokuxhumana eyeTruth Social kulandela lumhlangano, uTrump wazise ukuthi isivumelwano lesi asiseyikubakhona. Uthe uZelenskyy kahloniphanga iwofisi kamongameli weMelika, njalo “kakalungiseleli ukuthi kube lokuthula.”
Umhlangano lo oqhutshwe phambi kwentathelizindaba zeMelika lezeUkraine, ube lokuphikisana ngemva kokuba uZelenskyy ekhulume ngodaba lokuthi eleRussia lahlasela eCrimea ngo2014.
Umsekeli kamongameli weleMelika uJD Vance uhle wamethesa umlandu wokuqamba amanga phambi kwentathelizindaba.
“Ubona sengathi yikuhlonipha ukubuya ewofisini kamongameli weMelika ukuzohlasela inkokheli zelizwe ezizama ukumisa ukubhidlizwa kwelizwe lakho?”
UZelenskyy usuke eWhite House ngoLwesihlanu emini njalo kuhle kwamiswa umhlangano obekumele uqhutshwe lentathelizindaba.
Isivumelwano lesi besingesokuthi kube lesikhwama esamazwe amabili la kanye lokusebenzela ndawonye ekwakheni ilizwe ngemva kwempi, lokhu bekusitsho ukuthi eleUkraine lizakupha eleMelika inzuzo eziyilinganiso sokuyingxenye ekhulwini - i 50% kumali yonke evela kwezenjiwayo.
UTrump uthe isivumelwano sokwenjiwayo lesi besizaphathisa ekuvikelweni kweleUkraine, eleMelika lisekela amabutho ezwekazi leEurope ngemva kokumiswa kwempi leleRussia.
USenetha Lindsey Graham, owebandla lamaRepublican uthi, “Bengilethemba lokuthi isivumelwano lesi esizaguqula ubudlelwano sizahamba kuhle. Ngikhulume lo Zelensky ekuseni namuhla.”
UTrump ubegqugquzela eleUkraine ukuthi limise impi, esithi yilo elaqala limpi. Amabutho eleRussia ahlasela eUkraine ngoNhlolanja ngomnyaka ka2022.
Wasungula inkulumo leRussia kungela kuphatheka kweKyiv kumbe amanye amazwe akuzwekazi leEurope, okuguqula indlela uhulumende kaJoe Biden abephatha ngayo lindaba.
Kumbiko wakhe awuthumele enkundleni yeX esanda kusuka eWhite House ngoLwesihlanu, uZelenskyy ubonge uTrump lezizalwane zeMelika.
Uthe, “Ele-Ukraine lidinga ukuthula okugcweleyo njalo sisebenzela khonokho.”
Forum