UMnu Daniel Chapo ugcotshwe ukuba ngumongameli weleMozambique ngesikhathi ingcwethi zisithi amazwe asemhlubulweni wezansi yezwekazi leAfrica agoqela iZimbabwe alakho ukubhekana lodubo lokusilela kwamafutha ezimota, ukudla lemvundiso yefertilizer nxa udlakela lungaqhubeka kulelo.
Amazwe amanengi akumanyano weSADC asebenzisa iBeira Corridor eseMozambique ukuthengiselana lamanye.
Ezinye ingcwethi zithi udlakela lolu lulakho ukubangela ukungahlaliseki emhlubulweni lo njalo umanyano weSADC uthi uthumele iqula elizakhokhela ukuqhutshwa kwenkulumo zokumisa loludubo.
Udlakela lolu lwaqala kulandela ukwaziswa kwempumela yokhetho okubikwa lungaqhutshwanga kuhle ngabahlolisisa ukuqhutshwa kokhetho abagoqela i-European Union.
Abakhokheli bamazwe eSADC abanengi abahambanga emkhosini wokugcotshwa kukaChapo.
Obesemkhosini lo nguMnu. Cyril Ramaphosa wakweleSouth Africa, abakhokheli beTanzania, Malawi leKenya bathumele abasekeli babo.
Abanye njalo abangene lumkhosi bagoqela umongameli weGuinea Bissau uMnu Umaro Sissoco Embalo, labakhokheli bakahulumende we-Eswatini leRwanda.
Umgcinisihlalo weSADC njalo engumongameli weleZimbabwe uMnu Emmerson Mnangagwa uthumele umphathintambo wezomvikela uNkosikazi Oppah Muchinguri -Kashiri.
Forum