Isicelo somgcinisihlalo wenhlanganiso elwela amalungelo oluntu eyeSouthern African Human Rights Lawyers, uMnu Talent Rusere, esokuthi akhululwe ngesibambiso, i-bail siqhubeke sihlaziywa lidale likamantshi ngoMvulo.
URusere utshele idale ukuthi wathunjwa njalo watshaywa lokuhlukuluzwa ngabacatshangelwa ukuthi ngabacuphi engakahanjiswa emapholiseni.
Ipholisa elikhokhela ukucwayisiswa kwaloludaba uDetective Sergeant Edmore Chimera uphikise ukukhululwa kukaRusere ngesibambiso esithi akala ndawo yokuhlala eZimbabwe njengoba ebehlala kweleSouth Africa.
URusere yena utshele idale ukuthi ulesihlobo esivume ukuhlala laye ngesikhathi icala lakhe lithonisiswa njalo wapha idale ubufakazi balokhu.
Umantshi uMnu Isheanesu Matova uthe uzakwazisa isinqumo sakhe ngoLwesibili njalo uRusere uzahlala ejele emelele lesisinqumo.
URusere wetheswa umlandu wokuphuma elizweni engela maphepha kanye lokutshotshozela udlakela ngokuthumela amavideo ekuthaza izizalwane zeMozambique lamanye amazwe eSADC agoqela eleZimbabwe ukuthi zitshengisele ziphikisana lokuvota kwabeZimbabwe kukhetho lweMozambique kanye lempumela yokhetho lolu, okungamacala awalandulayo.
Forum