Umongameli Mnangagwa ube ekwele Botswana esikhundleni sakhe njengo mgcinisihlalo weSADC. Uthi kuqakathekile ukuthi amazwe asemhlubulweni wangezansi yezwekazi leAfrica, aqhubeke ebambene.
Ekhuluma esamukela isakhiwo seSADC esisesigodlweni seBotswana eGaborone, uMnangagwa uthe inyathelo leli litshengisa ukubambana kwamazwe angaphansi kwenhlanganiso le.
“Isakhiwo lesi eseSADC sima njengesibonile sokubambana kwethu, kanye lokukhululeka kwethu. Okuqakathekileyo yikuthi lesi sakhiwo sisondeza eduze njengamazwe weSADC.”
Inkampani eyeBotswana i Bongwe yiyo eyakha amahofisi eSADC ngaphansi kokubambisana lamazwe akumanyano lo kulokusebenzelana phakathi kwabohulumende lamankampani azimele wodwa, iPublic-Private-Partnership.
Umongameli Boko laye uthi ukuba lesakhiwo ezandleni zeSADC kutsho okunengi kule inhlanganiso lamazwe angaphansi ayo.
“Sihlangene lapha ukuthi sibengabafakazi bokubambana kanye konke okuhle okutshengiswa yisakhiwo sethu samahofisi eSADC.”
Besuka ekwamukeleni kwesakhiwo seSADC, omongameli bobabili balubhekise emzini we Rasesa, obucwadlana nje ledolobho leGaborone lapho okuzakhiwa khona isiphala sezikhali, iSADC Standby Force Regional Logistics Depot.
Umongameli Boko uthi ukwakhiwa kwesiphala lesi kuza ngesikhathi umhlubulo we SADC uqhubeka ubhekana lokungahlaliseki.
“Kulabanye abangakhululeka emazweni abo, ngakho badinga usizo. Thina njenge SADC sibone ukuthi siphathise ngokubumba ibutho esilisebenzisa ukuthi singenele lapho okulokungahlaliseki.”
Umongameli Mnangagwa yena okunguye otshaye ipiki yokusungula ngokusemthethweni ukwakhiwa kwalesisiphala, uthe kuqakathekile ukuthi iSADC ibe lesakhiwo lesi ukwenzela ukuthi iyenelise ukulwisana lokungahlaliseki okukhona emhlubulweni lo.
“Ukusungula ukwakha kwalesiphala kuzangesikhathi esiqondileyo lapho esibona umhlubulo wethu ubhekane lokungahlaliseki emazweni ambalwa.”
Ocubungula ezombusazwe, uMnumzana Effie-Dlela Ncube uthi noma nje kuqakathekile ukuthi kube lesiphala esizaphathisa ukugcina ukuthula, okubalulekileyo yikubusa ngendlela eqondileyo okuyikho okungaletha ukuthula.
“Ukuthula kulethwa kakhulu, hatshi libutho kumbe amasotsha. Kodwa yikubuswa kahle kabantu, ukuphatha kahle abantu kulombuso wabantu ngabantu, kungelabandlululo, akusoke kube lesizatho sokuthi abantu baye empini."
Isiphala sokugcina okugoqela izikhali lokunye sikhangelelwe ukuthi sibe sesiphelile ngomnyaka ka 2026. Uhlelo lokusungula isiphala lesi luza ngesikhathi izwekazi langezansi kwezwekazi leAfrica libona ukungahlaliseki ikakhulu emazweni afana le Democratic Republic of Congo kanye le Mozambique.
Forum