Uhulumende uthi useqalisile ukuthenga imitshina enceda ekwelapheni umkhuhlane wemvukuzane, isifo esesiqede abanengi elizweni, ikakhulu abaswelayo, njengoba bengenelisi ukuya kwelatshwa ezibhedlela ezingayisizo zikahulumende, besithi ziyadula. Kodwa ingcwethi kwezempilakahle zithi zinengi izithembiso uhulumende angizifeziyo.
Ekhuluma lentathelizindaba ngoLwesibili esigodlweni eHarare, ngemva komhlangano wabaphantintambo bakahulumende, umphathintambo wogatsha olubona ngezempilakahle, uDokotela Douglas Mombeshora uthe imitshina yemvukuzane ezathengwa izakuya ezibhedlela ezikhulu zikahulumende emadolobheni abalisa iChinhoyi, Gweru, Mutare leMasvingo.
Kodwa ocubungula indaba zempilakahle njalo engudokotela olekilinika yakhe eGweru, uMnu. Grey Mathonsi, uthi uhulumende engapheleli ekuthembiseni kuphela.
Inhlanganiso yeCancer Association of Zimbawe ithi abantu abafika inkulungwane ezimbili lengxenye (2 500) babulawa yimvukuzane mnyaka ngomnyaka eZimbabwe, ngoba inengi labo lingelamali yokubhadalela indleko zokwelatshwa. Ithi ulwazi olujulileyo phezu kwesifo lesi luyasilela, okubangela ukuthi abanengi badinge usizo isikhathi sesiphelile.
Kolunye udaba olucutshungulwe emhlanganweni wabaphathintambo bakahulumende izolo, umphathi wogatsha lwezokwakhiwa kwezindlu, uMnu. Soda Zhemu, utshayele uhulumende ihlombe, esithi sowenelisa ukwakha izindlu ezedlula inkulungwane ezingamakhulu amabili (200 000) umnyaka ka2025 ungakapheli- njengalokho owayekuthembisile.
Lanxa esitsho njalo uMnu. Zhemu, inkokheli yenhlanganiso emela izakhamizi zakoBulawayo eyeBulawayo Residents Association, uMnu. Winos Dube, uthi ngenxa yenani labantu abalokhe bedinga indawo zokwakha izindlu kumakhansili, kuba nzima ukukholwa lokho okutshiwo nguhulumende.
Ekhuluma emhlanganweni munye, owabaphathintambo bengatsha zikahulumende, okhokhela ugatsha lwezokwethulwa kwemibiko, uMnu. Jenfan Muswere, uthe uhulumende uphakathi kokulungisa umthetho ozahlolisisa ukusebenza kwalabo abakubhizimusi lokulondoloza impahla labantu bezimele, owe Private Investigators and Security Guards Bill, ngoba amabhizimusi amanje esevela mahlayana indawo yonke.
Uqhubeke wathi uhulumende uvumelane lamankampani asebenza ukuthi kwakhiwe njalo kulungiswe inkundla zemidlalo elizweni.
UMnu. Muswere ukhulume njalo phezu kodaba lwamandla kagetsi, esithi umongameli Emmerson Mnangagwa uqinisile ukuba ufuna ilizwe lonke libe lamagetsi angacitshwa mahlayana, yikho sokulohlelo lokuthi amadamu amakhulu aselizweni, abe lemitshina ezakwenelisisa ukulungiswa kwamagetsi avela emanzini.
Kodwa ocubungula indaba zenhlalakahle kazulu, njalo engumqondisi wenhlanganiso eyeCommon Market for Liberal Solutions, uMnu. Rejoice Ngwenya, uthi uzulu sekhathele ngokubambiswa ilitshe nguhulumende phezu kodaba lwamagetsi.
Emhlanganweni wayizola, abaphathintambo bakahulumende bekhulume ngodaba lwendlala ebhahileyo eselizweni, bathi ziqhubeka kuhle inhlelo zikahulumende ezokunceda izigidi ezedlula eziyisithupha lengxenye zabantu abangela kudla okwenelayo.
Forum