Amanye amakhansila akoBulawayo asole abanye babo esithi bachothoza uhulumende enkundleni zokuxhumana okungabangela ukuthi enqabe ukuphathisa idolobho ngemali yokufeza inhlelo zalo.
Lokhu kuphume emhlanganweni we Full Counci Meeting oqhutshwe ngoLwesithathu ntambama lapho okuhlafunwe indaba ezehlukeneyo ezigoqela ukusilela kwamanzi, ukulahlwa kwezibi mahlayana, lokudubuka kwezititshi ezithwala ingcekeza ezama sewage.
Ukhansila Mpumelelo Moyo uthe abachothoza uhulumende enkundleni zokuxhumana bazama ukuzibonakalisa bengananzeleli ukuthi kuzabangela ukuthi idolobho lakoBulawayo linganikezwa imali yokuthuthukisa inhlelo zalo. Uthe ikhansili yingxenye kahulumende ngakho kufanele besebenze ndawonye.
“Ungahamba kumakhelwane usiyacela ukudla wena uhleli umthethisa?” kubuze uKhansila Mahlangu wasenikeza umzekeliso othalakala eBhayibhilini.
Usekelwe nguKhansila Mxolisi Mahlangu yena othe: “Kambe ungathethisa umzali uphinde ufune akuncede?” Ukhuze abanye bakhe wathi impumela yabakwenzayo izahlupha izakhamizi.
Umfanekiso oqotshiweyo owe video yenkampani ebona ngokwethulwa kwembiko eyeCite ubonisa ukuba uKhansila Aleck Ndlovu uthe kufanele kube lamacebo okusetshenziswa kwemitshina yakulezi insuku ukugebha emigodini evele isikhona ukuze kutholakale amanzi.
Okhansila Dumisani Nkomo lo Ndlovu bathe kufanele ikhansili ijezise labo abalahla izibi endaweni ezingafanelanga kwathi uKhansila Ntandoyenkosi Ndlovu wathi kufanele ugatsha lwezempilakahle luthathe amanyathelo ngalabo abathengisa ukudla okungahlolwanga, ngoba kulesibonelo kwele South Africa ukuthi kuyingozi.
Ukhansila Mahlangu uthe kulemigoqo eminengi kuhlelo lokwakhiwa kwedamu le Glassblock ngoba lingelenkampani ezimeleyo, ngakho kungcono kukhangelwe ezinye indlela zokulethela idolobho amanzi, wasekela umbono kaKhansila Ndlovu. Kodwa ukhansila Roy Sekete uthe akulandaba ukuba lamaqhinga amanengi okuthola amanzi.
Ukutshaye indiva ukuthi kulabantu abachothoza uhulumende enkundleni zokuxhumana esithi kazi lutho ngakho wathi okumqoka yikuthi belwele ukuthi u “Plan A engehlula kuzanywe uPlan B.”
UKhansila Dumisani Netha ubemele umayor wakoBulawayo kulumhlangano. Abanye njalo okhansiila bakhulume ngokukhathazayo kulelodolobho.
Forum