Inhlanganiso elwela amalungelo omnotho wezakhamizi ezihlala endaweni okwenjiwa kizo amatshe aligugu eyeMining Affected Communities United in Action kweleSouth Africa yethesa umphathintambo wogatsha lwendaba zamapholisa uMnu. Senzo Mchunu umlandu wokwethula inkulumo elokucwasa ngobuzwe ixenophobia, ngemva kokuthi ethe kuqakathekile ukuthi abantu bakhumbule ukuthi otsheketsha abadinga ukuhlengwa osekwedlule inyanga bevaleleke emgodini wegolide eStilfontein eNorth West kulelolizwe ngabantu bokuza.
Umgcinisihlalo wenhlanganiso ye Mining Affected Communities United in Action uMnumzana Meshack Mbangula utshele iStudio 7 ukuthi kubaphathe kabi kakhulu ukuthi emhlanganweni wangolweSihlanu lapho abebekhangelele ukuthi umphathintambo Mchunu Uzobatshela ukuthi otsheketsha abasemgodini bazahlengwa nini njalo njani, uqede sonke isikhathi ebachazela ukuthi yizigangi eziselizweni ngokungekho emthethweni.
“Thina sithi ikhona into okuthiwa yibuntu. Igovernment yethu ayenze sure ukuthi while nayole irescue team yakhona ingakaqali ukusebenza abantu mabanikezwe amanzi lokudla. Because asifuni ukuthi masekuthiwa kuyongenwa phansi kukhitshwe izidumbu. So sithi ugovernment seva impilo zabantu. Ngabantu laba abaphansi lapha. Hayi ukuthi mhlawumbe yizilwane. Ngabantu.”
UMnu. Mchunu ubangele ukuthukuthela okukhulu futhi ngesikhathi esithi uyazi ukuthi bakhona abafuna labotsheketsha bokuza bahlengwe ngoba sebebaqomile.
“Inengi lenu ebelikhuluma lapha lithi njengezakhamizi lingene emsebenzini wabotsheketsha ngoba lilambile njalo lingelamsebenzi. Kodwa alisitsheli ukuthi yindaba emgodini lapha kugcwele abeZimbabwe labeMozambique.”
Umkhokheli wezakhamizi zelokitshini leKhuma, lapho inengi labotsheketsha laba abahlala khona uMnumzana Thembile Botman, uthi akuzwisiseki ukuthi kungani ngesikhathi kufanele kuhlengwe abantu abasengozini yokufa kuqalwe ngenkulumo ende echaza ukuthi ngabokuza.
Sicela ukuthi asibakhipheni bonke laba bantu. Ukwenzela ukuthi noma benze imposiso akwazi ugovernment ukubacharger ngasomething. Akukhathalekile ukuthi badabukaphi.”
Ingcitshi yezomthetho wezamalungelo oluntu uMnumzana Mametlwe Sebei uthi okufuna ukwenziwa nguhulumende lokhu ukwekela abantu befela emgodini ngesizatho sokuthi ngabokuza yikwephula isisekelo sombuso. Uthi uSection 11 wesisekelo sombuso weSouth Africa ukubeka kucace ukuthi umuntu wonke ulelungelo lokuphila. Lokhu uthi kusekelwa ngumthetho womhlaba uArtictle (6)1 owe International Covenant on Civil and Political Rights (1966) wona othi wonke umuntu ulelungelo elingasusekiyo lokuphila.
“Inkulumo yakho mphathintambo Mchunu ifana xathu lezazisethulwa ngabaphathintambo bakahulumende woncindezelo. Yonke inkulumo yakho isitshela ukuthi laba bantu ngabeZimbabwe, ngabeMozambique. Utsho ukuthi bona akusibo bantu?”
Asenelisanga ukukhuluma loMnu. Mchunu ngaloludaba
Kusenjalo otsheketsha laba baqalile ukuphiwa ukudla lamanzi lamhlanje ngemva kwesinqumo somthethwandaba. Umongameli Cyril Ramaphosa uthe kuzakwenziwa uhlelo lokubahlenga wathi loba bezaphathwa kahle kuhlonitshwa amalungelo abo, bengaphuma emgodini bazajeziswa ngumthetho ngamacala abalawo.
Forum