Izigidi lezigidi zabantu eMelika zivotile ngoLwesibili njalo abanye balokhe bevota kukhetho lokudinga umongameli phakathi kukaNkosikazi Kamala Harris loMnu. Donald Trump.
Besekuvele kwavota abedlula izigidi ezingamatshumi ayisitshiyagalolunye 81 million kusiyafika ngoMvulo kuhlelo lokuvota phambilini kokhetho olwe early voting, oluqhutshwa endaweni zokuvotela lapho umuntu avota mathupha, kuthi abanye bevote ngencwadi.
NgoMvulo, uMnu.Trump loNkosikazi Harris bakhankase esigabeni sePennsylavania, sona okuyiso esimqoka kulokukhetho. Bobabili batshengise ukuzimisela lokuthi bazanqoba kulolukhetho. Uphenyo olwehlukeneyo lubonisa ukuthi ngutshiki lobhanqa kulaba ababili ngakho akwaziwa ukuthi kuyowela ngaphi induku loxakuxaku.
Uphenyo lomsakazo we ABC News luveza ukuthi uMnu. Trump uzanqoba ezigabeni ezinhlanu ezimqoka kweleMelika, phakathi kweziyisikhombisa kodwa olwe phephandaba leWashington Post luthi uNKosikazi Harris anganqoba kwezine.I-New York Times yona ithi uMnu. Trump uyakhokhela ngezigaba ezine, uNkosikazi Harris ngezimbili, njalo ababili laba bangutshiki lobhanqa e Pennsylvania.
NgoLwesibili ntambana eMelika uNkosikazi Harris uzaphatheka embuthanweni wokubukela okwenzakaleyo esekolitshini leHoward University eWashington DC, lapho ayefunda khona ngeminyaka yama 1980s. UMnu. Trump yena uzabukela ukubalwa kwamavoti alolukhetho emzini wakhe eMar-a-Lago ePalm Beach, eFlorida.
Forum