Omele umongameli Emmerson Mnangagwa emhlanganweni omkhulu oweUnited Nations General Assembly njalo engumphathintambo wogatsha olubona ngokudlelana lamanye amazwe uMnu Frederick Shava ngoLwesithathu utshele umhlangano lo ukuthi izijeziso zomnotho ezetheswa abanye abakhokheli beleZimbabwe kumele zesulwe.
UMnu Shava uphinde wakhuthaza njalo ukuthi kube lezihlalo eziphathwa ngamazwe akuzwekazi leAfrica kunhlanganiso yeUnited Nations Security Council.
UMnu Mnangagwa akenelisanga ukungena lumhlangano lonyaka njengoba ethe ubambekile.
Abanye abakhokheli bamazwe omhlaba abethule imibiko eqakathekileyo ngosuku lwesibili emhlanganweni we-United Nations General Assembly eNew York bakhala ngezimpi, indlala, ukukhudumala komkhathi lokunye.
Omunye wabethule umbiko wabo nguMongameli Volodmyr Zelenskyy wakwele Ukraine othe eleRussia lifuna ukuthumba ezinye njalo izabelo elizweni lakhe.
UZelenskyy uthe abantu bonke kweleUkraine bafisa ukuba kubelokuthula.
Ucele amazwe amsekelayo ukuba amdingele ezinye izikhali ukwenzela ukulwisana ngamandla leleRussia.
Ukhulume kabanzi ngokuhlaselwa kwezititshi eziphela amandla kagetsi lomunye elizweni lakhe zisebenzisa amandla enuclear ezihlaselwa ngele Russia. Uthi lokhu kuyingozi enkulu engabulalisa abantu abanengi.
UZelenskyy ubonge inhlanganiso yeUnited Nations esanda kwethula iziqondiso zokuvikela izititshi lezi.
Abanye abethule imibiko yabo bagoqela UMongameli Nana Addo Dankwa Akufo-Addo wakwele Ghana othembise umhlaba wonke jikelele ukuba ilizwe lakhe lizaqhuba ukhetho olukhululekileyo ngoMpalakazi lonyaka.
Uthe ilizwe lakhe lithakazelela ukuba lohulumende kazulu hatshi okantando kayiphikiswa.
UMongameli Nangolo Mbumba owaseNamibia laye wethule umbiko wakhe eNew York lapho akhuthaze ukuba kulwisanwe lesikhudumezi somkhathi esesidale ukuhlupheka okwesabekayo amazweni atshiyeneyo.
Kukhangelelwe ukuba ngoLwesine kulabakhokheli bamazwe angaamatshumi amabili abazakwethula imibiko emhlanganweni lo.
Forum