Kwezempilakahle, sixoxa ngomkhuhlane ohlasela umgogodla i-menengitis olakho ukubulala ngesiphangiphangi uma ungelatshwanga masinyane.
Odokotela bathi umkhuhlane lo uhlasela njalo ingqondo, lowo olawo abonakale engani uphambene. Odokotela bathi i-meningitis ayikhethi ukuthi ihlasela bani. Izibonakaliso zawo zehlukene kusiya ngokuthi umuntu uhlaselwe ligcikwane lawuphi umhlobo. UDokotela Maphios Siamuchembu, umqondisi wogatsha lukahulumende olwezempilakahle esigabeni seMatabeleland North, ulandisa indlela umkhuhlane lo ohlasela ngayo izitho.
“I meningitis ngumkhuhlane ohlasela amanzi agombolozela ingqondo lomgogodla, umkhuhlane lo ubangelwa ngamagcikwane awomhlobo otshiyetshiyeneyo. Amagcikwane la athi engangena emzimbeni ahlale phakathi kwamanzi lawa okuthiwa yi Cerebrospinal fluid ebangele ukuvuvuka kwezitho zomzimba okuthiwa ngama menages.”
Udokotela Siamuchembu uqhubeka echaza ngezibonakaliso zalumkhuhlane.
“Umkhuhlane lo ubonakala ngokutshaya kwekhanda okungabi ngcono kwalo ungaze unathe amapain killers. Ungaya esibhedlela odokotela bazakukhangela okunye kwezinto abangakwenza yikuzama ukuthi bekugobise ikhanda, kwenza ikhanda libe buhlungu kumbe intamo ungasafuni kugoba. Bengakuthola lokhu odokotela bafuna ukuthatha amanzi awomgogodla beyehlola bebone ukuthi kulamagcikwane yini kungatholakala sebekunika umuthi ohambisana legcikwane eliyabe likhona.”
Umongi uMnunzana Mbonisi Dube ugcizelele esithi umzimba uyalimukisa umuntu ngomkhuhlane onjenge menengitis.
“Siyakhuthaza ukuthi umuntu engazibona umzimba utshisa intamo ibuhlungu, ehlanza kumbe ikhanda litshaya kakhulu, esehluleka ukukhangela ilanga, engela appetite, kumele afike esibhedlela abonisane labomongikazi babone nxa kuyiMeningitis bayelaphe kusalesikhathi sivikele amacomplications lokuswelakala kwempilo.”
Isakhamuzi sakoBulawayo, uMnunzana Pride Ndlovu, ulesihlobo esabulawa ngumkhuhlane lo.
“Thina sake salahlekelwa yisihlobo sitshaywa likhanda sisithi kuzadlula simnika ama pain killers, kuthe ngemva kwamalanga wadlula uthe esesiya esibhedlela kwabonakala ukuthi yi Meningitis. Sananzelela ukuthi ngumkhuhlane omubi ngoba umuntu kahlali kakhulu uyadlula nxa engayelatshwanga, kuqakathekile ukuthi abantu baye clinic bengezwa bethsaywa likhanda elingehliyo.”
Inhlanganiso yamazwe wonke ebona ngezempilakahle eyeWorld Health Organization ikhuthaza amazwe ukuthi aqine ekuhlabeni amajekiseni okuvikela umkhuhlane lo, ikakhulu ebantwaneni abasanda kuzalwa. I-WHO ithi kulabantu abafika phose inkulungwane lengxenye – 1,325 ababulawa yi-menengitis eZimbabwe ngomnyaka ka2020. Akwaziwa ukuba umkhuhlane lo sowabulala abantu abangaki kusukela ngalesos’ikhathi kusiyafika lonyaka.
Forum