Sekusele inyanga ezimbili ukuthi kuqhutshwe ukhetho lokudinga umongameli weleMelika, abazaphatheka kulolukhetho uMnu Donald Trump loNkosikazi Kamala Harris balungiselela ingxoxo-mpikiswano yabo yakuqala njalo bekhankasa ngodaba lomnotho. Intathelizindaba yeVOA uScott Stearns ukhangela lumkhankaso.
UMnu Donald Trump ukhankasa egqxile kudaba lwezomnotho njalo esola uKamala Harris.
“Nanku esikwaziyo ngoKamala Harris. Kalandaba lozulu weleMelika, ikakhulu abantu abasebenza nzima. Kala ndaba lani.”
Umkhankaso kaHarris uthi uTrump nguye ozalimaza izimuli ngokwehlisa imithelo yamankampani amakhulu.
“Ubukhokheli bami buzakuba bugxile ekuthuthukiseni izisebenzi zeleMelika.”
Udaba lwezomnotho luqakathekiswa kakhulu ngabavoti kulolukhetho. Yilo udubo uHarris okumele alulungise, kutsho ingcwethi yezombusazwe uMnu Hank Sheinkopf.
“Kumele achasise ukuthi kungani abantu bebhadala imali abayibona inengi kakhulu nxa bethenga amafutha emota, isinkwa lokunye.”
Ozangena kukhetho loTrump uMnu JD Vance uthi ukuvotela uHarris kuzabangela ukulahlekelwa yimisebenzi kwabanengi eMelika.
"Khumbulani abantu bonke abanotha ngokuthumela imisebenzi yenu kweleChina. Bafuna uKamala Harris. Indlela yokubanqoba iyodwa, asibalwiseni ngokuvota ngoLwezi.”
Ozangena kukhetho loHarris uMnu Tim Walz, uthi ibandla lakhe eleDemocratic Party yilo elizinikele kuzisebenzi zeleMelika.
"UDonald Trump lo JD Vance, bacabanga okutshiyeneyo lani. Into eyodwa abayaziyo ngezisebenzi yikuzisebenzisa kuphela kanye lokungazibhadali. Ithuba lonke abalitholayo balisebenzisa ukulwisana lezisebenzi kanye lokwala ukukhweza iholo.”
Sekusele inyanga ezimbili ukuthi kuqhutshwe ukhetho, kulokuncintisana okukhulu. Ucwaningo luveza ukuthi uHarris ukhokhela kancane uTrump elizweni lonke. Umvoti weMichigan uMnu David Martinez usekela uTrump.
"Ungumuntu othanda eleMelika. Ngibona sengathi ucabanga kakhulu ngabantu balelilizwe ukwedlula ukuzicabanga yena. Yonke into ayenzayo ngeyokuzama ukuphathisa omunye umuntu.”
Umvoti weGeorgia uNkosikazi Becca Rush usekela uHarris.
“Sikumnyaka ka 2024, sidinga ubukhokheli obutsha obuzaletha elakusasa elihle.”
Ngesikhathi beqhubeka ngomkhankaso uTrump loHarris bazaqeda iviki elilandelayo belungiselela ingxoxo-mpikiswano yabo eyakuqala mhlaka 10 wayonalinyanga.
Forum