Ukhansila Bruce Mmeli Moyo weNkulumane koBulawayo, owebandla le CCC owetheswa icala lokuthi wayeqoqa ukutshengisela phambilini komhlangano weSADC, ukhululwe ngoLwesithathu ebusuku ngemali yesibambiso eyebail. Igqwetha elimmelayo uMnu. Runganga utshele iStudio 7 ukuthi ukhululwe ngamadola eMelika alikhulu.
Kubikwa wayengavunyelwa ukwamukela ukudla okuvela kuzihlobo labangane esavalelwe lokuthi bembone.
Eloba enkundleni yebulenjini eyeX uthe ubonga bonke abamsekelayo lapho evalelwe okugoqela amagqwetha akhe.
Ababotshelwa isizathu esifanayo abebandla linye eHarare, abagoqela uMnu. Jameson Timba balokhe bevalelwe entolongweni njalo isinqumo sokuthi bengakhululwa ngemali ye bail sikhangelelwe ngoLwesihlanu.
Ezinye njalo iziphathamandla zebandla leCCC ezigoqela uMnu. Prince Dubeko Sibanda zilokhe zivalelwe, kanye labalwela amalungelo oluntu.
Lokhu kwenzakala lanxa inhlanganiso zamazwe omhlaba ezilwela ilungelo loluntu sezikhuthaze uhulumende ukuthi akhulule ababotshiweyo laba ngoba zisithi kusobala ukuthi abadalanga icala.
Ngakwelinye icele umthethwandaba we high court wenqabile ukukhulula nge bail, osomabhizimusi ababili uMnu. Mike Chimombe loMnu. Moses Mpofu abetheswa icala lenkohlakalo kuhlelo lukahulumende olokwabela abantu imbuzi.
Forum