Kukhetho lokudinga umongameli weleMelika, isigaba seGeorgia ngesinye sezigaba ezilakho ukuveza ozanqoba kukhetho lolu.
UKamala Harris wakhetha ukuhamba ngebhasi ebhoda eGeorgia ngemva komhlangano webandla lakhe omkhulu oweDemocratic National Convention waqala umkhankaso wakhe esikolo lapho yena lomsekeli wakhe uMnu Tim Walz abakhulume ngenjabulo abalayo ngomkhankaso wabo.
“Ngilenjabulo enkulu ukuba phakathi kweqembu elikhokhelwa ngumqeqetshi woqotho, ngeze lapha lozakuba ngumongameli weMelika uKamala Harris,” kutsho uMnu Walz.
UNkosikazi Harris uncome ubukhokheli babatsha baseGeorgia.
“Konke elikulwelayo yikho okuzathuthukisa ilizwe lethu lifike kuzinga elilandelayo.”
Ongena kukhetho lukamongameli emele ibandla leRepublican Party uMnu Donald Trump ubekhokhela eGeorgia okwesikhathi eside kulumkhankaso. Kodwa kulandela ukuphuma kumkhankaso kukaMongameli Joe Biden, ucwaningo luveza ukuthi u Trump loHarris sebelingana. Ongena kukhetho loTrump uMnu JD Vance ubese Georgia ngeviki edluleyo.
"Sizanqoba kukhetho nxa lingasivotela ukuthi sichaphe lapha eGeorgia. Lesi ngesinye sezigaba eziqakatheke kakhulu elizweni,” kutsho uMnu Vance.
Umkhankaso kaVance loTrump ugxile kakhulu kulokho abathi yimithetho yezenotho lemingcele engasebenzanga kuhle njalo uTrump etshele abavoti beGeorgia ukuthi kungumlandu kaHarris.
"Singathola ivoti yakho, ukukhwela kwentengo yempahla kuzaphela, abokuza abangela maphepha bazabiselwa lapho abavela khona. Bayangena njalo kumele sibavimbe. Libonile ukuthi usesithini, uthi silomngcele osebenza kuhle, babelomngcele ovuza ngendlela engakaze ibonakale kumbali yethu," kutsho uMnu Trump.
Ukunqoba kukaTrump eGeorgia kulakho ukuba nzima ngenxa yokusola akwenza usibalukhulu wesigaba lesi okubandla lakhe olodumo uGovernor Brian Kemp, owanqoba kukhetho laloba uTrump wayengamsekeli. UTrump uke wakhupha imibiko esithu uKemp lesinye isiphathamandla seGeorgia uBrad Raffensperger yibo abamdlisayo eGeorgia ngomnyaka ka2020.
"URaffensperger lo Brian Kemp, usibalukhulu wenu, yimi engamphathisa ukuthi avotelwe, kungayisimi ngabe kangenanga kulesisikhundla. Ngibona lonke liyakwazi lokhu. Kala kwethembeka, yebo, akathembeki,” kutsho uMnu Trump.
Ngalesisikhathi kulokuncintisana okukhulu eGeorgia, uTrump usebenzise inkundla yakhe yokuxhumana ebulenjini ukubonga uKemp ngosizo lwakhe kanye losekelo lwakhe eGeorgia.” UKemp ukhangelelwe ukuthi uzakhokhela umkhosi wokubuthanisa imali yomkhankaso kaTrump eAtlanta ngoLwesine.
Umthethwandaba waseGeorgia ngomnyaka owedluleyo wethesa uTrump labanye bakhe umlandu wokuzama ukuguqula impumela yokhetho lomnyaka ka2020 ngendlela ezingekho emthethweni. Amagqwetha kaTrump kuyonaliviki aphanyeke isicelo sokuthi udaba lolu olungasoze luthonisiswe kungakaqhutshwa ukhetho lulahlwe.
Ibhodi ebona ngokuqhutshwa kokhetho eGeorgia ngoMvulo ivume imithetho emitsha abanye abathi ilakho ukuphazamisa amalungiselelo okhetho lukaLwezi. Amalunga amabili ebhodi le aphikisana lemithetho le. Abathathu abavumelana lemithetho le banconywa ngamabizo nguTrump esithi balwela iqiniso, lempumelelo.
Forum