Impumela yokudingisisa okwenziwe zingcwethi ezicubungula umumo womkhathi iveza ukuba amazwe akumhlubulo weSADC, okugoqela eleZimbabwe, azathola izulu elingcono lonyaka nxa kuqathaniswa lomnyaka ka 2023/4.
Lokhu kuvezwe zingcitshi zomanyano weSADC lamuhla, ezithi isikhudumezi se El Nino ebesibangela indlala sesedlule zisithi kuzakuba lesikhudumezi se La Nina sona esenza umkhathi ube ngcono.
Ekhuluma lentathelizindaba emhlanganweni eHarare, uNkosikazi Rebbeca Manzou owogatsha olubona ngezomkhathi olwe Metereological Services of Zimbabwe uthe kuzakuba lezulu elingcono emhlubelweni wamazwe awe SADC.
‘’ Kunhlolisiso esesiyitholile kumazwe awe SADC lonyaka kuzaba lezulu elingcono nxa kuqhathaniswa lomnyaka osanda kwedlula ngoba isiphepho se El Nino sesedlule, sekusele isiphephe se La Nina sona esiletha izulu
UNkosikazi Manzou uqhubeke esithi akukacaci ukuba izulu lizakuna njani isigaba ngesigaba kwele Zimbabwe kodwa impumela iveza ukuba umnyaka ka 2024/5 uzakuba ngcono.
‘’ Inhlolisiso esiyenzileyo ngeye SADC, khona sizakhangela sibona ukuba eMatebeland, eMasvingo lase Mashonaland kuzabe kume njani izulu, kodwa hayi lonyak kungcono kulomnyaka osanda kwedlula’’
Ingcitshi kwezomkhathi emhlubulweni we SADC ziphinde zakhuthaza abalimi ukuba baqalise ukulungiselela ukulima ukuze bezame ukuthola isivuno esithe xaxa lonyaka kulomnyaka osanda kwedlula.
Abalimi abakhulume le Studio 7 bajabule kakhulu besithi bakhangelele ukuba kube lezulu elinengi kulanyakenye ukuze batholele izifuyo zabo okokudla.
Omunye wabalimi uMnu. Melusi Dlamini uthi udaba lolu luyamthabisa kakhulu.
‘’ Kuyadanisa lokhu ngoba lonyaka isimo sezifuyo zethu asimanga kuhle, kulendlala eyesabekayo. Kungakho singathaba kakhulu nxa izulu leli lingabakhona’’
Kodwa omunye umlimi uMnu. Thembani Siwela uthi ulethemba lokuthi lokhu okutshiwo zingcitshi kakusoze kusebenze kwamanye amazwe kuphela.
‘’ Sithemba ukuba akusoze kuphelele kwamanye amanzwe ukuna kwalo. Siyalifuna izulu ngoba indlala enje asikaze siyobone selokhe sathwetshulwa yingwe’’
Ele Zimbabwe libhekane lendlala eyesabekayo esitshiye ilizwe lidinga izigidi zamadola eMelika ukudingela abantu abafika izigidi ezisiyikhombisa okuthiwa bengabulawa yindlala.
Forum