Umthethwandaba kamantshi eHarare ngoMvulo unike isiqondiso sokuthi owayemela iBinga North edale lephalamende uMnu. Prince Dubeko Sibanda obotshwe ngoMgqibelo uzahlala esitokisini kuze kufike oLwesihlanu lapho okuzakwethulwa isinqumo sokuthi engakhululwa na ngemali yesibambiso eye bail.
Lokhu kuvezwe ligqwetha elimela uMnu. Sibanda uMnu. Alec Muchadehama, kungxoxo leStudio 7. UMnu. Sibanda ubotshwe ngoMgqibelo emngceleni weSouth Africa leZimbabwe eBeitbridge Border Post, wasiwa eHarare ngeSonto. Wetheswa icala lokukhuthaza ukuthi kube lodlakela elizweni ngalokho abikwa wakubhala enkundleni yokuxhumana ebulenjini esithi ngempela kufanele kubhikitshwe.
Abamabandla ezombusazwe labalwela ilungelo loluntu bathi bayabotshwa mahlayana njalo bayahlukuluzwa, ikakhulu kusukela kulungiselelwa umhlangano weSADC ogqitshwe ngempelaviki lapho eleZimbabwe elithethe intambo zokukhokhela lumanyano. Abanye abalwela ilungelo loluntu labamabandal ezombusazwe balokhe bevalelwe entolongweni.
Ukuhlaziya loludaba, sixoxa loMnu. Pashor Raphael Sibanda, ilunga lebandla leCCC yena othi uKhansila Mmeli Moyo wakoBulawayo laye ulokhe evalelwe ejele yeKhami njalo bayavinjwa ukuthi bembone kumbe bemuphe ukudla.
Kusenjalo, isikhulumeli sebandla leZANU PF uMnu. Christopher Mutsvangwa utshele intathelizindaba eHarare ukuthi uhulumende wenza ngabomo ukuthi abantu babotshwe bavalelwe ukwenzela ukuthi bengatshengiseli njalo sebengakhuluma ngoba umhlangano weSADC usudlule. Ukhulume amazwi la ehleka, njalo asenelisanga ukukhuluma laye ukuze sizwe ukuthi ubeqinisile kumbe esoma.
Forum