Owadlalela iqembu lesizwe elama Warriors uDumisani Mpofu uthi abaqeqetshi abayizizalwane zelizwe leZimbabwe kumele baphiwe ithuba lokukhokhela iqembu lesizwe kulabanye.
UMpofu uthi kusiya ngaye aluba abaqeqetshi abadabuka kweleZimbabwe yibo abaphiwa umsebenzi ngoba imbali yomdlalo wenguqu iveza ukuba iqembu labesilisa elimela ilizwe leZimbabwe lenelise ukuyadlala kumncintiswano wokudinga intshantshu zezwekazi leAfrica ngaphansi kwenkokheli yezizalwane zakuleli.
“Into yakuqala okumele siyilungisise yiZifa (Zimbabwe Football Association) ngoba singaba lenkokheli kuZifa izaqhatsha umqeqetshi. Khathesi siphonguqhatsha loba ngubani kodwa ungakhangela inengi labaqeqetshi abenza safinyelela kuAfcon ngabaqeqetshi balapha eZimbabwe. UFabisch wenza ibhola lethu lazakala kodwa asiyanga ndawo njalo yikho kumele silungise iZifa abadlali asebathatha umhlalaphansi bangene ezikhundleni ukuze ibhola lethu liyephambili,” kutsho uMpofu.
UMpofu ubeyingxenye yeqembu elimele ilizwe leZimbabwe okwakuqala kumncintiswano weAfcon ngomnyaka ka2004 elizweni leTunisia. Leloqembu beliqeqetshwa nguSunday Chidzambwa esebenza ndawonye loRahman Gumbo kanye loBrenna Msiska.
“Ngizizwa ngiqakathekile ngokudlalela engakwenza iqembu elaba ngelakuqala ukuyadlala kuAfcon. Ngadlalela iqembu lesizwe ndawonye labadlali abagoqela uZenzo Moyo, Joel Luphahla kanye loPeter Ndlovu njalo beliqinile leloqembu ngoba sasesilesikhathi eside sidlala sonke,” kuphawula uMpofu.
Ngo2006 uCharles Mhlauri nguye okhokhele iqembu leZimbabwe layadlala kumncintiswano weAfcon oqhutshelwe eEgypt, ngo2017 kubenguKallisto Pasuwa kuthi uChidzambwa uphinde njalo ngo2019.
Isizalwane selizwe leCroatia uZdravko Logarusic nguye obezibambile ngo2021, lapho iqembu leZimbabwe eliphumelele khona ukuyadlala kuAfcon ebiseCameroon, loba nje wasuka waxotshwa isikhundla sathathwa nguNorman Mapeza.
UMpofu, owaziwa ngegama lokusoma elithi Commando, waqala edlalela iqembu elincane elalidlala kusigaba sikaDivision 3 esigodlweni iHarare.
“Ngiqalise ukudlala ibhola ngileminyaka elitshumi lathobaminwembili ngidlalela iqembu leAluminium Tigers ebelidlalela eZimbabwe Grounds ngaseHighfield. Ngisuke lapho ngathengwa ngisuka kuDivision 3 ngayadlalela iqembu leRufaro Rovers ebelidlala kusigaba sePremier Soccer League,” kuchasisa uMpofu.
Ngemva kwalokho uMpofu udlalele amaqembu abalisa eleBlackpool kanye leleCaps United kweleZimbabwe, kuthi kweleSouth Africa udlalele iqembu leBush Bucks.
Okwamanje ungusomabhizimusi edolobheni leHarare.
Forum