Ingcwethi ezicubungula ezombusazwe, amabandla ezombusazwe, labantu jikelele bathi inyathelo elithethwe ngumongameli Joe Biden weMelika elokungancintisi kukhetho ngo Lwezi liyancomeka ngoba liveza umbuso wentando kazulu lokwakhiwa kwamabandla aqinileyo hatshi ukuthembela kunkokheli kuphela. UMongameli Joe Biden, oleminyaka engamatshumi ayisitshiyangalombili lanye-81 utshiye isikhundla sakhe izolo ngemva kokukhonona kwabantu abanengi abebandla lama Democrats abathi usegugile, kungakho akumelanga ancintise kukhetho lokudinga uMongameli wakwele Melika lonyaka.
Embikweni awethule ngeSonto ntambama uMongameli Biden uthe lanxa ebefuna ukuncintisa angene kuhlandla lesibili lombuso wakhe, kaseyi kwenza lokhu ngoba yikho okufanele ibandla lakhe lelizwe leMelika.
Ingcwethi ezicubungula ezombusazwe kwele Zimbabwe zithi okwenziwe ngu mongameli Biden kubonakalisa ukuqakatheka kwamabandla aqinileyo lokujuliswa kombuso wentando kazulu.
Eyinye yalezi ngcwethi esebenza lenhlanganiso ye Zimbabwe Democracy Institute (ZDI) uMnu Bekezela Gumbo uthi okwenziwe ngu mongameli Biden kuyamukeleka kakhulu.
Osekele umNU. Gumbo ngu Mnu Mlungisi Dube ingciwethi ezimeleyo yena othi umongameli Biden wenze kuhle ngokubona ukuba kasenelisi ukuqhubeka watshiya.
Okhokhela ibandla le People's Unity Party (PUP) uMnu Hebert Chamuka uthi okwenziwe ngu mongameli Biden kuveza ukuba kulombuso wentando kazulu kwele Melika.
Lokhu kusekelwe ngu Mnu Gift Siziba owayengowebandla le Citizens Coalition for Change kodwa oseku Blue Movement.
Osekela ibandla le ZANU PF ekugatsha lwabatsha kubandla leli uMnu Mehluli Ncube uthi njengebandla abalandaba lokwenziwe ngu mongameli Biden esithi kumele ozangena eMelika esule izijeziso zenotho athi zetheswa eleZimbabwe.
Kodwa eyinye ingcwethi eye kolitshini le National University of Science and Technology (NUST) uMnu Nkosikhona Sibanda uthi okwenziwe ngu mongameli Biden kuzabangela ukuba uMnu Donald Trump anqobe kukhetho.
Kulandela ukungaqhubi kuhle kwakhe kungxoxo-mpikiswano ngenyanga edluleyo, abanye abakhokheli bebandla lama Democrats bakhuthaze umongameli Biden ukuthi adedele omunye kusikhundla sozamela amaDemocrats kukhetho lokudinga umongameli.
Esithi kasoze ancintise kukhetho, uMnu Biden uthe uzasekela umsekeli wakhe uNkosikazi Kamala Harris ukuba ancintise kukhetho.
Forum