UMnu. Job Sikhala okhokhela inhlanganiso yeNational Democratic Working Group ufikile ngeSonto elizweni ngemva kwenyanga ezine engekho esithi uyelatshwa kwamanye amazwe kulandela ukukhululwa kwakhe esitokisini lapho ayesehlale isikhathi esedlula umnyaka owodwa lengxenye yawo esetheswa icala lokugqugquzela udlakela lokwethula imbiko engamanga.
Efika egcekeni lendizamtshina eHarare, uMnu. Sikhala utshele intathelizindaba ukuthi amapholisa awasoze ambophe ngoba engadalanga icala.
UMnu. Sikhala watshela umhlangano eSwitzerland ukuthi kuyephulwa ilungelo loluntu eZimbabwe.
Uthi wagula esesitokisini ngoba mhlawumbe wafakelwa itshefu ekudleni.
UMnu. Sikhala usanda ukuxhasana loMnu.Jacob Ngarivhume we bandla le Transform Zimbabwe lapho athi kufanele kutshengiselwe kusolwa inkohlakalo lombuso ongakhululekanga elizweni.
Lokhu kwenzakala amapholisa esithi awafunu umuntu ozabangela udlakela phambilini komhlangano womanyano weSADC ozaqhutshwa eZimbabwe ngenyanga ezayo.
Ukuze sizwe okunengi ngaloludaba, sixoxa loMnu. Comfort Mpofu, umgcinisihlalo wabatsha labafundi kunhlanganiso ye National Democratic Working Group.
Forum