Abanye abasekeli bebandla le ZANU PF balokhe besithi bafuna umongemeli Mnangagwa aqhubeke ebusa lanxa amahlandla akhe amabili okukhokhela ilizwe ephela ngomnyaka ka 2028. Ingcwethi kwezombusazwe zithi indlela abasekeli laba abenza ngayo ingabe iveza ukuba abatshonjalo bakhuluma bezimele kumbe umongameli Mnangagwa nguye obathumayo ngoba engafuni ukutshiya isikhundla.
Lokhu kuza ngemva komhlangano webandla le ZANU PF eMasvingo lapho abasekeli bebandla leli abathe umongameli Mnangagwa kumele abuse kuze kuyefika u2030.
Amazwi la aza ngemva kwamaviki amabili selokhe umongameli Mnangagwa wazisa uzulu ese Mutare ukuba kasoze aqhubeke engu Mongameli welizwe.
Akwaziwa ukuba abasekeli bebandla leli benza lokhu belandela Mnangagwa kumbe hatshi kodwa ingcwethi ezicubungula ezombusazwe zithi kusobala ukuba umongameli kajonganga ukutshiya isikhundla.
Eyinye yalezingcwethii ngu Mnu. Herbert Chamuka owebandla le People’s Unity Party othi okwenzakale eMasvingo kuveza ukuba inyathelo lika mongameli Mnangagwa lingabe liyindlela yokulinganisa ukuthi uzulu uzakuthini.
Amazwi ka Mnu. Chamuka asekelwe ngenye ingcwethi uMnu Pride Mkono owenhlanganiso ye People Power.
Lokhu kugcizelelwe ngenye ingcitshi uMnu Herbert Ncube yena othi umongameli Mnangagwa kasoze atshiye isikhundla sakhe.
Kodwa eyinye ingcwethi uMnu Liberty Dube uthi abantu bazenzele abakucabangayo eMasvingo.
Osekela ibandla le ZANU PF uMnu Thabani Dube uthi umongameli Mnangagwa kumele ahlale esikhundleni.
Isimemezelo sikamongameli Mnangagwa sabuya ngesikhathi kulokungahlaliseki ngenxa yemizamo phakathi kwebandla lakhe leleZANU PF eyokuthi kwesulwe imigoqo yesikhathi sokuhlala ewofisini kamongameli welizwe.
Sokudume islogan esithi 2030 uMnangagwa uzabe ekhona lanxa kulabanye kubandla leli abakuphikisayo lokhu.
Forum