Umongameli Emmerson Mnangagwa uphawule ngokusemthethweni lamuhla uhlelo lokukhumisana umlotha kudaba lwe Gukurahundi lapho akhuthaze abantu ukuthi bebambane njalo babe lesineke uhlelo lolu luze luphutshe.
Ephawula ngokusemthethweni uhlelo lwakhe lokukhumisana umlotha ngombhuqazwe weGukurahundi, umongameli Emmerson Mnangagwa akachazanga ukuthi uhlelo lokukhulumisana luyaqala nini.
"Sengiphawula ngookusemthethweni uhlelo lwami lolu lweGukurahundi Community Outreach Programme, kodwa kusukela lamuhla ngilutshiya ezandleni zenkokheli zomdabu."
Umongameli wekhansili yezinduna eZimbabwe, uMnu. Mtshana Khumalo uchaze ukuba abakabi lelanga lokuqala imihlangano yohlelo lukamongameli.
"Asikabilelanga lokuthi siyaqala nini imihlangano eziqintini, njalo singaphuma lelanga lokuqala inhlelo zokuyakuzulu sizalazisa. Kuthi lokusebenza kwentathelizindaba asikakuxazululi kodwa kuqakathekile ukuthi zibekhona ukuze bazise uzulu ngokwenzakalayo."
Ekhuluma ngemva kokuphawulwa kohlelo lweGukurahundi Community Outreach, isikhulumi senhlanganiso yababekuviyo lebutho ele ZPRA, uMnu Burster Willie Magwizi uthi indwangu ikhuthe ugatsha.
"Ungananzelela umongameli uhlelo lwakhe lolu kaluphathanga ngendlela, indwangu ikhuthe ugatsha bekumele aqale avume ukuthi wenza icala, axolise kuthi sekula dela ezinye inhlelo kodwa yena uhamba phambili yena kunguye owonela abantu, njalo uthi luhlelo lwakhe okutsho ukuthi lapha sisadlala."
Induna uMnu. Dakamela uthi uhlelo lolu kumele luphathwe ngobuciko uma kukhangelwa abesifazana abadlwengulwa ngesikhathi sombhuqazwe weGukurahundi.
"Ungananzelela kunengi okwenzeka ngalesosikhathi, kulabomama abadlwengulwa ngesikhathi sombhuqazwe, indaba enjalo iphathwa njani, kuqakathekile ukuthi sibelobuciko obuphezulu ekuphatheni udaba oliunje sikhangela leminyaka esidlule kanye labathi bebanjwe iganyavu bazithwala bazala abantwana bakhona ezigabeni kodwa kudala indaba ezinjalo bezifihlwa."
UMfundisi Useni Sibanda uthi uhulumende kumele abone ukuba uhlelo lolu uyalusekela ngazo zonke indlela.
“Udaba lukamongameli lolu kumele kubelesiqiqniseko sokuthi abaphatha loluhlelo bayatholiswa yonke imfanelo ukuze uhlelo luhambe kuhle, lobanje kulokhe kungacaci ukuthi luzabizamalini."
Ngomnyaka ka2019, uMnangagwa wahlala phansi lozulu lenkokheli zomdabu emizameni yokuxazulula udaba lweGugukurahundi olwabangela ukufa kwabantu ababikwa besedlula inkulungwane ezingamatshumi amabili.
Lamhlanje, uMnangagwa uchaze ukuba abantu bengajahi ngoba kuyindlela yokukhumisana umlotha kungela kugijima kusetshenziswa indlela yeZimbabwe ngoba abamhlophe kuyibo abadala ukuba kubelombhuqazwe weGukurahundi.
Forum