EleZimbabwe lomhlaba jikelele ngoMvulo, belinanza impilo yomuyi uMnu. Joshua Mqabuko Nyongolo Nkomo owayengumsekeli kamongameli welizwe, owatshona mhlaka 1 kuNtulikazi ngomnyaka ka1999.
Inengi elixoxe leStudio 7 lichaze umuyi uMnu. Nkomo njengeqhawe elalizimisele ukubona isizwe esikhululekileyo njalo esikhokhelwa ngenhlonipho.
Induna uMayengwa Fuyana weMaphisa uthi umuyi wendlala iqhaza elilesisindo.
UChief Sikhobokhobo weNkayi uthi kunzima ukuthola umuntu onjengomuyi.
Owalwa kumpi yenkululeko ekuviyo leZIPRA uMnu. Mathew Sibanda uthi udaniswa yikuba iZimbabwe iyehluleka ukuphuma losuku olusemthethweni olokunanza umuyi.
Isakhamuzi sePlumtree koMasendu uMnu. Elton Dube uthi umuyi uMnu. Nkomo wayehlonipha amasiko.
Umhlali wakoBulawayo, uMnu Ben Moyo owalwa kumpi yenkululeko uthi umuyi watshiya umlandu.
Olwela amalungelo oluntu njalo engumabhalane jikelele wenhlanganiso ye lbhetshu LikaZulu uMnu. Mbuso Fuzwayo uthi umuyi walwela amalungelo oluntu okusobala.
Osakhulayo ophatheka kwezombusazwe, uMnu Ostallos Siziba uthi amandla okuqhubeka bephatheka kwezombusazwe bawathola ekuzinikeleni kukamuyi uMnu. Nkomo.
llunga ledale lephalamene koBulawayo uNkosikazi Linda Sibanda uthi inyembezi azomi zokukhumbula uNkomo.
Umuyi uMnu. Nkomo wazalwa mhlaka 19 ngoNhlangula ngomnyaka ka1917 wabhubha ngomnyaka ka1999 mhlaka 1 Ntulikazi ephethwe ngumkhuhlane wemvukuzane. Wayethethe uJohanna Fuyana belabantwana abane ababalisa uThandiwe, uSibangilizwe, uSehlule loThuthani. Wabangumsekeli kamongameli weZimbabwe kusukela ngomnyaka ka1990 kusiya ku1999. Ibandla ayelikhokhela eleZAPU lenza isivumelwano seUnity Accord ngo1987 ngemva kokufa kwabantu abedlula inkulungwane ezingamatshumi amabili ngombhuqazwe weGukurahundi.
Kusenjalo, ngoLwesihlanu ngeviki edluleyo bekukhunjulwa umkhokheli webutho leZIPRA umuyi uMnu. Alfred Nikita Mangena owabhubha ngemva kokudutshukelwa yibhomba eZambia mhlaka 28 ngenyanga kaNhlangula ngomnyaka ka1978.
Forum