Abazempilakahle bathi insumpa, yona eyikukhula kwenyama zesikhumba, iyelapheka iphele njalo kuqakathekile ukuba olayo ayehlolwa elatshwe ingakaxhwali. Kubika uAnnahstacia Ndlovu.
USikhwicamfundo Solwayo Ngwenya uthi abanye bazalwa belayo insumpa kodwa kwabanye imila sebekhulile.
"Ezinye insumpa ziluphawu lwemuli uzalwa ulayo kodwa ezinye umuntu ziyamphuma esekhulile loba emncane ngakhokhe uma kunjalo uyabe umele uyehlolwa."
UDokotela Ngwenya uqhubeke wathi ezinye insumpa zilakho ukubangela umkhuhlane wemvukuzane yesikhumba.
"Insumpa eziphuma umuntu esemdala kumele zikhangelwe muntu ayehlolwa kusasemasinya ukuba zingadali umkhuhlane wemvukuzane yesikhumba njalo kumele umuntu elatshwe iphele ingaqhubeki ikhula."
UDokotela Edwin Mzingwane Sibanda uthi insumpa ziyelapheka, ngakho abantu bengasabeli khatshana. Uqhubeke wathi insumpa zibangelwa ligcikwane elibizwa ngokuthi yi Human papilloma virus (HPV). Imvama ziyaziphelela kodwa i HPV vaccine ingasiza ukuzelapha.
Isakhamuzi seGwanda, uMnu Mthulisi Nare uthi ulazo insumpa njalo azibuhlungu kodwa zikhula mbijana mbijana.
"Ngilazo insumpa ebusweni kodwa azibuhlungu njalo azikhuli ngokuphangisa zithule zicijile njengrnalithi azikhuli ngokuohangisa."
UNkosazana Sheron Gumbi ongumongameli wenhlanganiso ebona ngabalebala elimhlophe eyePricess Safety Foundation uthi ilanga libangela ukuthi inengi labantu laba babe lensumpa.
"Singananzelela eMatabelelabd ilanga liyatshisa okumangalisayo kuthi abanye bethu abalesimo sebala bengatshiswa lilanga bacina belensumpa ezilakho ukubapha uhlupho ekuphileni kwabo."
UGumbi uchaze ukuba insumpa lezi zilemihlobo ehlukeneyo.
"Insumpa lezi ziyimihlobo ehlukeneyo, ezinye ziyaguga, ezinye ziyabumbana zicine zidala icancer, umuntu ucina engahlalisekanga. Kulungile ukuthi uma ziqala umuntu kumele ayehlolwa. Kudingakala ukuncediswa, ezinye ziyelapheka kodwa zingaphuzelwa zidala icancer."
Ukhuthaze uzulu, ikakhulu olebala ukuthi adinge usizo kusesemasinya engazibona ephuma loba eyodwa njalo balakho ukubancedisa.
Abezempilakahle bagcizelela ukuthi banengi abantu abahlaselwa zinsumpa elizweni kodwa bayaphuza ukuyading usizo.
Forum