Amapholisa amise ukuqhutshwa komhlangano we Citizens Coaliton for Change emahofisini ebandla leli eChinhoyi lamuhla, esithi umbuthano lo ubungahlelwanga ngokusemthethweni. Lokhu kulandela ukubotshwa kwamalunga alelibandla izolo angamatshumi ayisikhombisa lasitshiyangalombili -78, agoqela uMnu. Jameson Timba, esetheswa icala lokuqhuba umhlangano ongekho emthethweni.
Isiphathamandla se CCC uMnu. Amos Chibaya, obekufanele akhulume kumbuthano weChinhoyi lamuhla, utshele iStudio 7 ukuthi amapholisa abegcwele amahofisini abo behluleka ukungena ukuze beqhube umhlangano wabo.
Uthe lanxa engekho obotshiweyo lamuhla eChinhoyi, kudayadanisa ukuthi kabavunyelwa ukuqhuba imihlangano yabo
Kusenjalo, igqwetha elimela ababotshwe izolo eHarare, uMnu Marufu Mandevere uthi bazamiswa emthethwandaba kusasa.
‘’Bazamiswa edale kusasa. Kuthiwa bayenza umhlangano ongekho emthethweni’’
Isikhulumeli samapholisa uMnu Paul Nyathi utshele intathelizindaba ukuba abantu laba babotshelwe ukwenza udlakela ngemva kokujikijela amapholisa ngamatshe lezigubhu ngesikhathi amapholisa efuna ukuzwisisa ngalumhlangano.
Kodwa abalwela ilungelo loluntu bathi ukubotshwa lokhu kuveza ukuba kulokhe kungakabi lombuso wentando kazulu kwele Zimbabwe selokhe kwaphela ukhetho nyakenye.
Omunye wabakhulume lokhu ngu Mnu Herbert Chamuka owebandla le People’s Unity Party osole kakhulu ukubotshwa kwabantu laba.
''Kasivumelani lakho lokhu kutshengisa ukuba kulokhe kuhlukunyezwa abantu kuleli selokhe kwaphela ukhetho. Sthemba ukuba bazakhululwa’’
Kodwa osekele ibandla le ZANU PF uMnu Nobert Mabhena uthi amalunga e-CCC kumele ahloniphe umthetho.
‘’Nxa abantu besephula umthetho kumele babotshwe akukho okumangalisayo lapha ngoba bephule umthetho welizwe ngokwenza umhlangano ongavunyelwayo’’
Ibandla leCCC lithi imihlangano yomibili echitha-chithiweyo ibingeyokunanza iInternational Day of the African Child, lapho lweInternational Day of the African Child lapho uhulumende wabelungu eSouth Africa abikwa wabulawa njalo walimaza abanye babantwana besikolo ababetshengisela kulelolizwe ngomnyaka ka 1976 besola ubandlululo.
Kolunye udaba, okhokhela abahluleli kwele Zimbabwe uMnu Luke Malaba namhlanje ukhokhele uhlelo lokugcotshwa kwabahluleli abatsha kwele Zimbabwe abalitshumi lanye.
Abalitshumi bebengabe dale le High Court kuthi oyedwa ubengowedale le Admnistrative court.
Abahluleli laba babalisa o Faith Mushure, Ngoni Nduna, Regis Demure, Philipa Philips, Gibson Mandaza, Joel Mambara, Naison Chivhayo, Vivien Ndlovu, Sijabuliso Siziba lo Mpokiseng Dube.
Lokhu kulandela imihloliso yokukhetha eyenziwa kudingwa abahluleli laba, iJudicial Service Commission yanikeza uMongameli Mnangagwa amabizo wasebakhetha.
Forum