Ixuku labantu litshengisele esigodlweni senhlanganiso yabantu abaya emacansini beyibulili bunye eye Gays and Lesbians Association of Zimbabwe (GALZ) eHarare izolo besithi abantu laba kumele basuswe elizweni.
Abakade betshengisela laba bebesithi imisebenzi yenhlanganiso yeGALZ iphambana lomthetho wokudalwa kwabantu. Bebephethe amabhakane alemibhalo esola abantu laba egoqela ethi: ‘phansi labantu abalobulili bunye’, asibafuni eZimbabwe.’
Basole kakhulu abantu abathandana bebulili bunye befunga besithi bazatshela uhulumende avale amahofisi enhlanganiso le.
Amalunga enhlanganiso ye GALZ athi afice amahofisi ayo elotshwe amabala okuba atshiyane lemsebenzi yawo yokukhuthaza ukuthandana kwabantu abalolili bunye.
Omunye osekela ukutshengisela lokhu uMnu Zakithi Tshuma uthi kabavumelani lezenzo zabantu laba.
‘’ Asifuni ukuba imikhuba le igcwale kwele Zimbabwe. Sifuna ukuba batshiyane lemkhuba yabo kuleli kuphelele emazweni abo hatshi lapha kwelakithi’’
Lokhu kusekelwe ngu Mnu. Simbarashe Maringosi ongumfundisi othi ele Zimbabwe akumelanga lamukele okwenziwa ngabantu laba.
‘’Akusontando kamlimu ukuba bathandane. Siyakwazi okwaphazamisa isodoma le Gomola asifuni kwenzakale kuleli, kusani vele’’
Kodwa okhokhela inhlanganiso ye-GALZ uMnu Chester Samba uthi okufunwa ngabantu abatshengiseleyo laba kuphazamisa ilungelo labo.
‘’ Kumele bahloniphe amalungelo ethu njengalokho esikwenza amalungelo abo. Nxa besola akumelanga bekwenze ngendlela enje kumele batshengisele kodwa bekwenza ngokusemthethweni’’
UMnu. Samba usolwe ngesinye isakhamuzi se Harare uMnu Mlungisi Nkomo othi kabasoze bagoqe izandla kusiba lomonakalo wokuvumela imikhuba athi ngeyakwamanye amazwe.
‘’ Ngokubona kwami kumele lokhu kungenziwa ngoba kuphambana lobuntu bethu njengabantu be Africa. Akuhambelani leziqondiso zethu kuleli’’
Ukutshengisela lokhu kuza ngemva kokuba amanye amalunga ebandla lokholo awe United Methodist Church kwele Zimbabwe etshengisele ngenyanga edluleyo esola ukuthandana kwabantu abalobulili bunye.
Uhulumende we Zimbabwe ubikwa engasekeli ukuthandana kwabantu laba, njalo isisekelo sombuso selizwe kasicaci ngaloludaba, kodwa asivumeli ukutshadiswa kwabo emacaweni loba emithethwandaba.
Ngomnyaka odluleyo, umsekeli kamongameli welizwe, uMnu. Constantino Chiwenga, waloba incwadi esola ukuphiwa koncedo lokufunda kwabantu abalobulili bunye esithi kumele beyekele izenzo zabo ezimbi. Kodwa inhlanganiso ezizimeleyo zathi lokhu yikwephula kwamalungelo abantu laba.
Forum