Ukwethesa umntwana inkanda lusiko olwenziwa ngenhloso yokuvikela ukuthi inkanda yomntwana ingaweli phakathi kumbe ukuvuvuka.
Odokotela bathi umntwana engaba kusimo lesi kufanele ethwalelwe esibhedlela ngokuphangisa ngoba engaphuza ukwelatshwa, ulakho ukulahlekelwa yimpilo.
Odokotela, inyanga, labokholo lwesiKhristu bathi balendlela ezehlukeneyo zokwelapha lesi isimo, esivame ukuhlasela abantwana kuphela.
Odokotela bathi amathambo omntwana, kanye lokhakhayi, kuyabe kubuthakathaka lapho ezalwa okuyikho okwenza ukuthi ikhanda linciphe nxa ezalwa ukuze azalwe lula.
Isakhamuzi sakoBulawayo, uNkosikazi Nomathamsanqa Mlilo uthi owakhe umntwana wakhe wamethesa inkanda ngeqanda.
"Zinengi indlela abantu abethesa ngazo abantwababo kodwa owami ngamethesa ngeqanda, sambhala isiphambano ngeyoke yeqanda kakaze ahluphe usefunda."
UNkosikazi Similo Nkomo uthi owakhe umntwana wamethesa inkanda enkonzweni.
“Mina ngiyakhonza, njalo enkonzweni yethu umntwana simethesa ngecooking oil lesawudo uyakhula owami usekhulile kakaze abulawe yinkanda.”
UMnu. Thembelani Sangweni ongumfundisi uthi bethesa umntwana inkanda ngamafutha okupheka lesawudo njalo uchasisa ngokwelatshwa kwalokho athi yinkanda yangaphakathi.
"Inkanda yangaphakathi layo iyelapheka silendlela esiyelapha ngayo, umntwana uyanatha umuthi okwensuku ezinhlanu asile akhule njengabanye abantwana."
Udokotela wabantwana uMnu. Wedwa Ndebele uthi kuthatha inyanga ezintathu ukwelapha inkanda yaphambili kuthathe phose iminyaka emibili ukuthi eyemuva ivaleke.
"Zinengi izinto ezingabangela ukuthi umntwana avuvuke inkanda, engabe esilela uVitamin D, ikhanda lilamanzi amanengi kumbe ehlaselwe ngumkhuhlane odala ukuba inkanda iwele kumbe ivuvuke."
Usikhwicamfundo Solwayo Ngwenya ukhuthaza abazali ukuthi bagijimisele abantwana esibhedlela bahlolwe belatshwe.
"Umntwana engabuya elenkanda eweleyo, kumbe evuvukileyo siyamhlola simelaphe imikhuhlane esiyabe sithe sayithola njalo okuvamileyo yikuthi inengi labantwana liyabe lingasela manzi emzimbeni ngoba estshaye kakhulu waphela amandla lamehlo awela phakathi."
Ugogo uTryphine Ncube owelaphela emkambo weMakokoba uthi umuntu omdala owela inkanda uyabe ephosiwe.
"Zikhona futhi izihlahla zokwelapha abantu abadala abayabe bewele inkanda, uyelatshwa ngezihlahla asile."
Odokoteta bathi ikhandalomntwana likhula okwesibanga esingaba yi2cm ngenyanga. Bathi uma ungakhangela ekhanda inkanda iyabe iphefumula ngoba kuyabe kuleyaphambili leyemuva.
Ngesikhathi umntwana ekhula ubuchopho buyabe bukhula lenkanda ivaleka, kutsho ingcwethi kwezempilakahle.
Forum