Owake wakhokhela ibandla eliphikisayo ele Citizens Coalition for Change, i-CCC, uMnu Nelson Chamisa uthi lobanje iqula le Southern African Development Committee (SADC) seliphendule incwadi alilobela zona ekhonona ngempumela yokhetho lwanyakenye, kathokozi ukuba liyaphuza ukungenela kudaba lwe Zimbabwe, kodwa uthi ulethemba lokuba loludaba luzaxazululwa kungakafiki ukhetho oluzayo olomnyaka ka 2028.
Ekhuluma lentathelizindaba namhlanje kweyinye ihotela e Harare uMnu. Chamisa wazise ukuba selokhe ukhetho lwedlulayo, uselobele i-SADC incwadi ezimbalwa esithi ufuna ingenele kuleli.
UMnu. Chamisa uthe inhlanganiso ye SADC lomanyano we African Union izanikeza umbiko weqiniso ngendlela ukhetho olwenziwa ngayo zize zithi aluqutshwanga ngemfanelo. Uthi ulethemba lokuba kuzakuba lokungenela kwabomakhelwane kundaba zombusazwe welizwe. Uthi ububi bomnotho bubangelwa yikuthi ukhetho aluqhutshwanga kuhle nyakenye.
UMnu. Chamisa uqhube wathi i-SADC seyaphendula ezinye incwadi azilobayo kodwa udaniswa yikuphuza kwabo ukwenza lokhu.
“Sifuna ukuba bazongela kudaba lokungahanjiswa kuhle kokhetho okwenzakal kuleli. Udubo ngokuqilwa kokhetho yikuba sokulethe indubo ezifana lohulumende ongafunwa loba ngubani, njalo esehluleka ukulungisa indubo zabantu. Sababhalela baphendula kodwa sesifuna bazelungisa okuhluphayo’’
Amazwi la asekelwe ngowayeyisikhulumeli sebandla leCCC uMnu Gift Ostallos Siziba othi uvumelana lamazwi ka Mnu. Chamisa ngoba ilizwe alimanga kuhle ngalokho kufanele kungenele amazwe awe Africa.
“Njengoba etshilo uMongameli sifuna ukuba bangenele ngoba ukhetho alwenziwanga ngemfanelo. Isimo sibi elizweni nxa kungalakukhulumisana udubo luzaqhubeka lusanda elizweni, yikho esifuna bazokwenza lapha’’
UMnu. Chamisa uqhubeke wathi indubo ezibhekane labantu eZimbabwe sezifuna ukuba kube lokukhumisana umlotha abamabandla ezombusazwe labezinkonzo bacubungule loludaba kube lesisombululo.
UMnu. Chamisa, yena owatshiya ibandla le CCC nyakenye esithi selingenelwe yimpehlane, uthi lanxa wasuka ebandleni le CCC ukhuluma njengomuntu owavotelwayo ngomnyaka ka 2023. Uthi uhulumende okhona ubambe okwesikhatshana nje kusalungisiswa impumela yokhetho luka 2023. Uthi akumelanga u2028 afike kungakalungiswanga athi yikuqilibezelwa okwenziwa ngo 2023.
Kodwa isikhulumeli sebandla leZANU PF uMnu Farai Marapira uthe uMnu. Chamisa udinga ukuphuma kumaphephandaba nje kuphela esithi indaba zokhetho sezedlula, esithi iSADC ayilani lalokho osekusenzakala eZimbabwe.
“UChamisa ukhuluma umbono wakhe. Lilungelo lakhe. Akutshiloyo batshono batshona bekutshona, Bekutsho. Njenge ZANU PF ukhetho solwadlua akusela SADC lapha. Nxa esithi kukhona okuhluphayo. Akusadingi SADC lapha’’
UMnu. Marapira uthi nxa uChamisa efuna ukukhulumisana loMongameli Mnangagwa uyazi lapho okulamahofisi awebandla le ZANU PF. Ukhuthaze uMnu. Chamisa ukuthi ame ukusebenzisa intathelizindaba alande umongameli welizwe mathupha.
Ingcwethi ecubungula ezombusazwe esebenza lenhlanganiso ye Young People’s Network, uMnu Nkosilomusa Dube uthi kusobala ukuba uMnu. Chamisa ulokhe esafuna ukuphatheka kwezombusazwe kodwa esithi kaboni ukuba iSADC izangenela kwele Zimbabwe ngoba uMongameli Mnangagwa esesiba ngu mgcinisihlalo walinhlanganiso ngo Ncwabakazi.
"UChamisa ufuna ukuba kube le SADC kodwa ISADC ayisela azakwenza phezu kwalokho eyakutshoyo. Kubuhlungu ukuba uthembisa abantu kodwa akuselalutho ngoba uMongameli Mnangagwa uyabe esekhokhela SADC kumalanga alandelayo’’
Forum