Ilizwe leNigeria lithi lizasungula uhlelo lokukhuphula inani lamapholisa ezigabeni zalelolizwe ezingamatshumi amathathu lasithupha-36 okungeyinye yemizamo eyokwenqabela ukuhlaselwa ngamaqembu ahlomileyo, ukuthunjwa kwabantu, lobunye ubudlwangu-dlwangu.
Kuvele kulamanye amapholisa kulezi izigaba edlula inkulungwane ezingamakhulu amathathu; 300 000 alwisana lobudlwangu-dlwangu lobu. Kodwa abantu beNigeria bemukela lelinyathelo bexwayile.
Intathelizindaba ye Voice of America u Timothy Obiezu usethulele loludaba olutolikwe njalo lwafundwa nguSithandekile Mhlanga weStudio 7.
Ngenyanga kaMfufu ngomnyaka odluleyo, isifundi seNigeria uLatifah Ibrahim, oguqulwe ibizo ukwenzela ukumvikela, wayesiya lapho ahlala khona phandle kwekolitshi kusihlwa lapho yena labanye bakhe ababili bathunjwa ngabesilisa abahlanu ababehlomile esigabeni se Gandu enyakatho yeNigeria.
Uthi wezwa abangane bakhe belwisa njalo behlaba umkhosi bedlwengulwa ngabesilisa laba.
“Babadlwengula phambi kwethu. Amehlo ethu ayevaliwe. Satshaywa, sahlukuluzwa.”
Uqhubeke wathi yinhlanhla ukuthi kadlwengulwanga njalo udaba lolu lwabikwa emapholiseni. Abathathu laba bakhululwa ngemva kwamalanga amane imndeni yabo isihlawule imali eyayifunwa yilabo ababathumbayo.
Umdeni ka Ibrahim wabhadala ngama naira imali elingana lamadola eMelika azinkulungwane ezintathu lamakhulu amane ukuze bamkhulule $3, 700.
“Umdeni wami wawuhlukumezekile njalo ukhathazekile. Kwakungalula. Ikakhulu umama. Wayekhathazeke kakhulu.”
Ukuthunjwa kwabantu besekubhadalwa inhlawulo ukuthi bekhululwe sokubhahile eNigeria lapho isimo somnotho welizwe esiqhubeka sisiba sibi.
Inhlanganiso yeNigeria eye SBM Intelligence ithi ilobufakazi bezehlakalo ezizinkulungwane ezine lamakhulu ayisikhombisa 4, 700 ezokuthunjwa kwabantu ngamaqembu ahlomileyo selokhe umongameli Bona Tinubu wathatha intambo zombuso. Inkulungwane lenkulungwane zabantu zasuswa emizini yazo ngodlakela.
Abezomvikela eNigeria bayehluleka ukwenqabela ukuhlaselwa ngama qembu amalwa ecatsha aweBoko Haram le Islamic State West Africa Province, labanye.
Ukuze alwisane laloluhlupho, uhulumende weNigeria uvumile ngoNhlolanja ukukhuphula inani lamapholisa aqhuba lumsebenzi.
Umthetho lo ungaphumelela, isigaba ngesigaba eNigeria sizavunyelwa ukuhlela indlela amapholisa la azasebenza ngayo. Sokusele ukuthi umthetho lo uvunywe yinkundla ye senate njalo abantu makhaza bathi ungafeza injongo yawo nxa usetshenziswa kuhle.
Asizweni izakhanzize Abuja oMnu. Simon Ibu lo Francis Oparanoziebekhuluma ngalelinyathelo.
"Amapholisa ngabantu abavela kulezo izigaba, bayazazi indawo zabo njalo bazasebenza ngcono kulabantu abangayaziyo indawo.”
“Bazadinga abantu bakuleyo indawo. Kungenzakala ulutho kuleyo ndawo sizakuzwea. Kuzabangela ukuthi umumo ubengcono kodwa uhlupho yikuthi abezombusazwe bazaluthatha loluhlelo bethusele abaphikisana labo.”
Inhlanganiso eqhuba uphenyo eyeAfrobarometer ithi amapholisa eNigeria ngamanye alenkohlakalo.
Babikwa belesihluku, ubuqili, lobudlwangu-dlwangu kodwa bayakuphika lokhu. Iziphathamandla zamapholisa zihleli zithembisa ukuthi zizahlolisisa loludaba zijezise abatholakala belecala.
Asizweni ingcwethi ecubungula ezomvikela uKabiru Adamu:
”Esikudinga kakhulu yikuthi abantu bethembeke njalo kwazakale abakwenzayo. Nxa kungekho lokhu ekubuseni ilizwe asingeke sabumba imithetho.”
Amapholisa eNigeria ayahlolisiswa kulandela ukutshengisela ngenyanga kaMfufu ngo 2020 abantu elizweni lonke besola udlakela lwamapholisa njalo besithi kufanele kubelemithetho eletha ukuthula.
Ingcwethi zithi uhlelo lokwengezelela amapholisa ezigabeni lungehlulwa yikusilela kwemali. Kodwa iphalamende yeNigeria it isahlolisisa imbono evela kunhlanganiso ezizimeleyo lazakhamizi ingakavumeli umthetho wokuthi kube lamapholisa la.
Forum