Umongameli wele Kenya, uMnu. William Ruto uvule ngokusemthethweni umbukiso wezamabhizimusi, owe Zimbabwe International Trade Fair ko Bulawayo lapho ancome khona uhulumende weZimbabwe ngokusungula imali yohlobo lwe Zig.
Umbukiso lo, ophela namuhla, ujayele ukuvulwa ngoLwesihlanu kodwa bekulindwe uMongameli Ruto yena ofike izolo koBulawayo.
Embikweni wakhe wokuvula lumbikiso UMongameli Ruto uncome uhulumende weZimbabwe uthe imali entsha yeZIG yiyo enganceda ukuvuselele umnotho kwele Zimbabwe.
"Isizatho sikahulumende sokufaka imali entsha eZimbabwe iZIG ephakanyiswa ngokugejwayo okufana legolide lokunye okwenjiwayo kutshengise isibindi esikhulu nguhulumende weZimbabwe. Lokhu kubonisa ukuthi eleZimbabwe likhangelele ikusasa elihle lentuthuthuko enkulu."
UMongameli Ruto uyephambili esithi ilizwe lakhe lifunde okunengi kwele Zimbabwe eliqhenya ngemvelo yalo lokwembiwayo njalo lizahlala lixhasana lele Zimbabwe.
"Ulomngane wakho omkhulu ngoba UKenya izama lawe ebuhleni lebunzimeni isebenzisana lawe isiyaphambili. Nkulunkulu abusise iZimbabwe unkulunkulu abusise iAfrica, ngilifisela okuhle asande sana."
UMphathintambo wezokuthengiselana uMnu Mangaliso Ndlovu ukabuliswe ngumbukiso walonyaka
"Kungumnyaka esijabulela kakhulu ukuthi inani lama company abuyileyo lapha ezotshengisa ubuciko lobuncwethi babo lingaphezulu kakhulu sibona ukuthi silama company adlula 766 abelapha eh amazwe avela phandle afika 26 last year besile 21 sikhangela ababuya ukuzo exhibitor okokuqala besedlula 133 ama 1st time exhibitors konke lokhu kutshengisela ukuthi ama company ayakubona ukuqakatheka kokuthi babuye bezobukisa abakwenzayo bexoxisane labanye bevula indawo abangathengisela khona izinto zabo."
Amazwe abuye ngobunengi kuhlanganisela lalawo asolwa nguhulumende weZimbabwe esithi uwethesa izijeziso zomnotho. UMnu Larry Socha osebenzela esigodlweni sommeli weMelika eHarare uthi elemelika lifuna ukuthuthukisa ubudlelwane lele Zimbabwe.
"Kuqakathekile ukuthi amakampani eMelika akhangelele ukuvula amabhizinisi eZimbabwe. Kodwa izimbabwe ingathi ilezijeziso zomnotho ngoba uMongamel Joe Bidden wesula izijeziso mhlaka 4 March njalo sesikhangele uhlelo lwethu lwezijeziso zomnotho sisiyaphambili."
Le Bhilithane layo ibibukisa kuTrade Fair yalonyaka UMnu Martin Aslop usebenzela kusigodla sommeli weBhlithane eHarare, uchaza ngobudlelwane obukhona phakathi kwelizwe lakhe leZimbabwe.
"Ukuthengiselana lokuthuthukisa ezomnotho kuyinto eqakathekikeyo phakathi kwethu leZimbabwe, kuyinjongo yethu ukuthi sisebenzisane sisiyaphambili thina iUK leZimbabwe."
UMnu Charles Mungani ngumfuyi wenkomo esiqintini sesiGodini, ubebukisa inkomozaakhe ezithandwe nguMongameli Mnangagwa lomunye wakheuRuto baxoxisene laye.
"Abadala bathi bahawukela inkomo lezo ngokubona umumo wazo zizinkomo zenyama zizinkomo zochago lamathole njoba liwabonile amathole la kade bawakhangele alama two months."
Ohlaziya ezombusazwe lezomnotho uMnu Effie Dlela Ncube uthi umbikiso weTrade Fair awuncedi lutho kubahlali bako Bulawayo.
"ITrade Fair le ayilamehluko lalezi zinye ezidlulileyo lapho obona khona ukuthi izinto zonke sihlezi eHarare ngokuba amakampani asuke abukisa laphana ngasuka ngaphandle kwelizwe lasuka eHarare.
Akukangaki ukuthi uhlangane lenkampani yomuntu osuka eMatabeleland ebukisa kuliyadawo lokhu kufanele kutshintshe ngoba kuveza ukuthi umnotho uhlezi e Harare lapha eMatabeleland abantu behlezi phakathi kobuyanga."
Umbukiso weZimbabwe International Trade Fair, ongowesinkulungwane ezingamatshumi ayisithupha lane 64, upha amankampani ithuba lokuthengiselana.
Owalonyaka uhamba phansi kwendikimba ethi: "lnnovation: The Catalyst to Industrialisation and Trade. Ekuseni namhlanje amazwe womabili alobelane izivumelwane zokusebenzelana ama Memondum of Agreements estate House phambile kwenkokheli zombili zalamazwe.
Umongameli Willia Ruto sebuyele eKenya kukanti uMongamel Mnangagwa uhambile laye eHarare. Ngimele iStudio 7 igama lami ngingu Ezra Tshisa Sibanda
Forum