Inengi labadabuka eZimbabwe abahlala kweleBotswana lokhe likhala ngokuthi isimo sokuphathwa ngocuku ezandleni zabaqhatshi asikaguquki kangako okubangela ukuthi ihofisi yommeli weZimbabwe kweleBotswana ithi iqhubeka ithola izikhalazo ezinengi zabeZimbabwe abhlala kulelolizwe, ikakhulu phezu kokungatholi iholo.
Ababalisi abahlanu abakhonona ngokuthi lokhe bezama ukuthola iholo labo okweminyaka phose eyisithupha edluleyo badinga uncedo kuhofisi yommeli weZimbabwe kwele Botswana.
Abahlanu laba babesebenza kwesinye isikolo edolobheni leFrancistown kodwa bathi ngenxa yokuzwisisa isimo semali yomqatshi ngesikhathi besungula bavuma ukuthi bazathola imali yabo uma isimo singabangcono.
Bakhala ngokuthi lemithetho yelizwe leBotswana iyabafulathela ithatha icele lomqatshi, bona besala besegcekeni.
Umnunzana Ntokozo Thebe osebenzela eGaborone uthi abaqhatshi abanengi bakhangelela phansi abantu beZimbabwe ngenxa yesimo esikhona ekhaya.
“Bayakwazi ukuthi ungazi uyenze njani uzakwela komunye umsebenzi lapho ozahlukunyezwa khona. Ngokunjalo sesihleli ukuthi sithole isinkwa. Ngabe konke kulungile ekhaya ngabe abasiphathi kanje.”
Ihofisi yommeli weZimbabwe ithi iphethe indaba ezinengi zabeZimbabwe abakhala ngokungaphathwa kahle ngabaqhatshi.
Noma nje kuvame ukuthi abakhonona kakhulu ngesiphatho esingasihle ngabangela maphepha okuhlala elizweni, ihofisi le ithi kulezinsuku bathola imbiko etshiyeneyo.
Umsekeli ka mmeli wehofisi yeZimbabwe kweleBotswana uMnu. Witness Ngwenya uthi bahlangana lendaba ezitshiyeneyo phezu kokungaphathwa kahle kwabeZimbabwe angabaqatshi balelolizwe.
“Zinengi kakhulu indaba lezi, abanye baye bangalamaphepha abanye belamaphepha. Sihambisa indaba lezi kungatsha zikahulumende we Botswana kukhangelwe ukuthi abantu laba baqhatshwe ngaphansi kwaluphi ugatsha.”
UNgwenya uthi okudanisayo yikuthi ezinye izizalwane zeZimbabwe ezilamankampani, lazo ziqhatsha abantu bekhaya zingabaholisi kuhle.
“Ikakhulu kugatsha lokwakha, abakithi abalamankampani bayaqhatsha abantu bakithi, besuka lapho bengabaholisi. Sekuvamile sibili ukuthi kube ngabantu bakithi.”
Forum