Usibalukhulu omutsha webhanga lelizwe eleReserve Bank of Zimbabwe uMnu John Mushayavanhu namuhla wethule imali yeZimbabwe entsha eyaziwa ngokuthi yiZimbabwe Gold kumbe i-ZiG. UMushayavanhu uthi limali ilohlonzi ukwedlula idola leZimbabwe eselimile ukusebenza njalo uthi i-Zig izaqeda ukukhwela kwentengo yempahla mahlayana njengalokho okwenzakala lezinsuku.
Esethula umbiko wakhe omayelana lomhlahlandlela wokusetshenziswa kwemali lonyaka, oweMonetary Policy Statement, uMushayavanunhu wazise ukuthi imali entsha le isihle yaqala ukusebenza namuhla. Uthi njalo imali eyephepha imi kanje: kule 1 ZiG, 2 ZiG, 5 ZiG, 10ZiG, 20 ZiG, 50 ZiG, 100 ZiG le200 ZiG. Uthe njalo eyelitshe kule half ZiG leQuarter ZiG, zona athi zizakwethulwa ngokuya kwesikhathi.
UMushayavanhu, oqale umsebenzi njengosibalukhulu weRBZ kunsukwana ezedluleyo, uthe imali entsha le ilesisindo esikhulu ngoba idola leMelika elilodwa lithengwa ngamaZiG alitshumi lantathu, 13.4. Ngedola leZimbabwe eselesuliwe, idola leMelika belithengwa ngamadola aphezu kwangamatshumi amane, 1:40 kusiya phezulu, obekudala ukuthi intengo yezinto ikhwele njalo-nje.
UMushayavanhu uxwayise labo abagcine idola leZimbabwe leli elidala ukuthi balihambise emabhanga phakathi kwamaviki amathathu alandelayo ukuze baphiwe amaZiG.
‘’ Sesibeke ukuba kusukela ngo Mvulo ele Zimbabwe selizaqala ukusebenzisa imali entsha. Amabhanga onke atshelwa ukuba bazasebenzisa imali ye Zimbabwe Gold currency ukuze wonke umuntu aqale ukusebenzisa limali’’
Uqhubeke esithi ulethemba lokuba imali entsha le kayisoze ilahlekelwe yisisindo mahlayana njengama-bond notes futhi uthe izasebenza ndawonye ledola lakweleMelika leRand njengalokhu obekuvele kusenzeka.
‘’ Imali leyi kayisoze ikhiphe idola le Melika. Njelngalokho okuytshiyo ngumthetho wethu idola le Melika silalo kuze kuyfika u2030’’
UMushayavanhu ukhuthaze uzulu ukuthi ayithembe limali ngoba ithemba kuyiso isisombululo esizaletha ukuhlaliseka kwezenotho kanye lentuthuko.
Kodwa ezinye ingcwethi kwezomnotho zithi kaziboni lokhu kusenzeka. Enye yazo nguMnu Masimba Kuchera, osebenza lenhlanganiso yeDisability Centre.
‘’ Akula okuzaguqula ngoba uzulu we Zimbabwe vele kamthembi uhulumende we Zimbabwe. Bengaze betshintshe imali befake enjani kungelathemba kuhulumende"
Amazwi kaKuchera agcizelelwe ngenye njalo ingcwethi kwezenotho uMnu Owen Tshuma, owenhlanganiso yeZimbabwe Economic Forum, othi okwabangela ukuwa kwedola leZimbabwe akukalungiswa.
‘’ Lokho okwakuvele kuhlupha ngedola leZimbabwe lanamhlanje lokhu kukhona. Akula okuzaguquka lapha ngoba umuntu wonke uyakwazi okwenza ukuba size"
Kodwa enye njalo ingcwethi engusomabhizimusi eHarare uMnu Simbarashe Maringosi uthi uyathemba ukuba imali le izanceda umnotho weZimbabwe.
‘’ Imali le izasiza kakhulu nxa sikhangela indaba zokuba intshintshi ibe isihlupha elizweni. Sizakwenza ukuba kube lokuthengiselana okubalulekileyo’’
Forum