Izakhamizi zeZansi yemaNdebeleni sezikhala ngentengo yenkomo ezithi iphansi kulezinsuku ngesikhathi inengi labafuyi lithengisa inkomo ukuze zingahlaselwa yindlala njengalokhu okwenzeke nyakenye.
Inengi lezakhamizi kulesisabelo liphila ngokufuya lokuthengisa inkomo.
Inkomo ezinengi ebezizothengiswa eTakaliawa, eGwanda, ngoLwesibili kuliviki zibiselwe emakhaya ngemva kokuba abanini bazo bengavumelananga labathengayo ngentengo.
Inkomo ezinengi bezithengwa ngeR10 ikhilogramu elilodwa okudale ukuthi inkomo ezilesisindo samakhilogramu angamakhulu amathathu zibize imali egange R3 000.
Sixhumane loMnu. Obert Moyo oweBorabora eMlambapeli othi isimo esikhona sizwisa ubuhlungu.
“Lapha sizwa ubuhlungu ngendlela okuyiyo yona eshowa, inkomo ithengwa R3000, R3500 kusiya kuR4000 kungakho asazi ukuthi njengoba siphila ngokufuya thina sitholani ngokufuya lokhu , ngoba nnxa uzafuya inkomo okweminyaka emihlanu udlula phezu kwamadrought anzima ,uyazithengela imithi ubusuthola iR3000 sizorojwa emini kukhangele abantu bathathe inkomo zethu sisale singelalutho bona bahambe,” kutsho uMoyo.
Amazwi la asekelwe nguMnu. Shepard Mancama oweHalisupi laye othi njengomfuyi kajabuli ngentengo yenkomo yalezinsuku.
“Uhlupho esikhangelane lalo ngezifuyo kulumnyaka okokuqala yikuthi ukudla akukho izulu aliyenelanga okunye okusikhathaza kakhulu yikubana izifuyo zethu kazithengwa ngentengo efaneleyo izizatho ezinikwayo ngakho azisisuthisi ngoba abathengayo bathi bona izifuyo zethu okwakuqala kaziqinanga ngemfanelo.
Okwesibili bathi bona inyama igcwele kakhulu emadolobheno , okumangalisayo nxa inyama igcwele emadolobheni njengokutsho kwabo kungani besiza phakathi kwesikhathi bedinga inkomo lezo lokhu kusitshengisa ukuthi iqiniso alikho, thina esikufisayo yikuthi kubelentengo yokuthi isifuyo kasithengwa ngemali ethize, lokhu okwe willing seller , willing buyer kwenza ukuthi labo abaswelayo bawele bathengise izifuyo ngentengo ephansi,” kutsho uMancama.
Ngaphandle kwentengo yenkomo abafuyi bakhala njalo ngentengo yembuzi abathi layo iphansi kakhulu. Nangu uMnu. Mtshumayeli Sibanda owe-Kafusi eGwanda South.
“Izifuyo sizifuya nzima , imbuzi inkomo, kodwa uzathola ukuthi imbuzi nxa sesibuya lapha eshowa abathengayo yibo ababuya besinika iprice akusiphathi kuhle khonokhu ngoba bayabe sebethenga imbuzi zethu ngama R300 zona besiyazithengisa US$100 kungakho lokhu akusiphathisi thina siyathathelwa impahla zethu mahala.Thina besikhangelele ukuthi uhulumende kumbe ikhansili isidingele abathengayo njalo kube yithi esifaka intengo hatshi ukuthi basifakele bona,” kutsho uSibanda.
USobhuku weMatulungundu, kuWard 16 eGwanda South, UMnu. Admas Matjaka uthi ingtengo le ifaba lokuthi batshontshelwa izifuyo zabo libalele. Kungakho uthi kuyadingeka ukuthi uhulumende angenele.
“Abalimi ngenxa yendlala ekhona baletha inkomo zabo ngobunengi ukuthi zizothengwa kodwa manje akula abathengayo, abathengi yibona labana abalutshwane abazifunela intengo yabo, sizwa kuthiwa inkomo zigcwele ezithengiswayo , asila qinisiso lakho, thina siphila impilo yakudala esasithengisa inkomo eCold Storage lakoGrills ukuthi kwenzakalani siyamangala, njengoba ekhona uhulumende kafake ilihlo,” kutsho uMatjaka.
Abathenga inkomo abaxoxe lomsakazo weStudio 7 bathi ukwanda kwenkomo lokhu sekudale ukwehla kwentengo yenyama ngoba inengi kakhulu. Bathi njalo sithengiswa ngemali ephakathi kwamarand angamatshumi ayisithupha R60 kusiya kuR80 ikhilogramu linye.
Nyakenye abafuyi kulesisabelo balahlekelwa zinkomo ezifika inkulungwane ezihlanu 5000 ngenxa yendlala.
Ukungani kuhle kwezulu njalo lonyaka sekutshiye abafuyi bedidekile engqondweni ngoba sekumele bathengise ezinye ukuze bathenge isikuba kungenani lentengo yazo ephansi.
Forum