Lumthimba obuzelwe ngabedlula ikhulu ngoMgqibelo, eChinotimba Hall, ubuqoqwe ngabenhlanganiso elwela amalungelo abasifazane eye Pathways Women’s Girls Child Support ngenhloso yokunanza ilanga labesifazane ele International Women’s Day elaphawulwa yinhlanganiso yomanyano wamazwe womhlaba, eye United Nations.
Lelilanga liyathokozelwa njalo lisiba yisikhumbuzo sokuqakatheka kwamakhosikazi mnyakawonke mhla ziku Mbimbitho 8.
Inhloso yalumbuthano ibingeyokuzofundisa abasifazane ngophawu lwalelilanga, inhlupho abahlangana lazo bephana njalo lenkuthazo yabangakwenza ukuthuthukisa impilo zabo.
Ongumholi walinhlanganiso uMnu. Trymore Ndolo uveze ukukhathazeka ngendlela adubeka ngayo, ikakhulu amantombazana aqala ukuthomba ngokuswela imvunulo nxa besesikhathini, ikakhulu emaphandleni.
“Bacina bengasayi esikolo,” kutsho uNdolo.
Eqhubeka ngathi: “Njalo lezambuzi emaphandleni azikho, lezikhona kazilungelanga abantu besifazane ikakhulu nxa befuna ukutshintsha imvunulo.”
Inkulumo kaNdolo isekelwa luphenyo lwabe United Nations International Children's Emergency Fund, abathi inengi ikakhulu emaphandleni akuleli lisebenzisa izichibi lamaphepha angahlambulukanga, okungabangela imikhuhlane ye cervical cancer.
Ukwehlisa lokhu kanye lokuthuthukisa omama, sebasungula uhlelo lokuthunga imvunulo abangayangazo enyangeni kanye lenhlelo zokugubha imgodi yamanzi esigabeni seHwange begabela njalo omama izivande.
Phezu kohlupho lolu uNkosikazi Anete Sithole wenhlanganiso ye Zimbabwe Vendors and Markets Association yena ukhala ngokudlwengulwa kwabantwana okungavezwayo ezimulini.
“Kubuhlungu kakhulu kimi ongumama ngoba kuthi sekubenjalo, abemuli bathi umntwana kabhadalwe, umadlwengulwa ekelwe.” uyatsho.
Ongumfelwakazi , uNkosikazi Siboniswe Sibanda, uthi emakhaya inhlupho zokudlwengulwa kwabasakhulayo zandile, ethi abomthetho kufuze bahlale belilihlo lalaba.
Inengi ebelikulumthimba lo licele kuhlangothi lukahulumende olubona ngezenthuthuko ukuba lubaxhase ngemali yokuqala amabhizimisi. Bathi imbangela yokuhlukunyezwa kwabasifazane yikungabilendlela yokuziphilisa emakhaya.
Bathi bayabe befisa ukwenza imisebenzi yezandla egoqela ukuthunga, ukweluka kanye lokulima. Abohlangothi lolu bakhuthaze izakhamizi ukuba zisondele emawofisini abo ukuze balolongwe, babolekwe njalo imali nxa ithe yabakhona.
Bekukhangelwe njalo ukuba labomthetho bazazofundisa ngezenhlalo emakhaya, kodwa kabasaphumelelanga.
Indikimba ye International Women’s Day yalonyaka ithi ‘Invest in Women: Accelarate Progress’, okuyinkuthazo yokuxhasa abesifazane ukuze kubenzima lengqubekelaphambili ephakemeyo.
Forum