Ugatsha olugcina isikhwama semali yokulungisa imigwaqo olweZimbabwe National Road Admnistration (ZINARA) luthi lwenza konke okusemandleni alo ukulungisisa imigwaqo, kodwa limizamo iyasilela ngoba amakhansili kawenzi umsebenzi wawo ngemfanelo.
Ekhuluma lentathelizindaba namuhla umholi weZINARA uMnu. Nkosilathi Ncube uthe ugatsha lwakhe lupha omasipala imali kodwa amakhansili yiwo ayehluleka ukulungisa imigwaqo.
Uthi phakathi kwemali yakuleli engange ZW$868 billion etholwe yiZINARA ngomnyaka odluleyo, phose isilinganiso samatshumi ayisitshiyagalolunye ekhulwini, 88 percent yaphiwa amaqembu alungisa imigwaqo kanye lamakhansila atshiyeneyo elizweni lonke jikelele.
Uqhubeke esithi iZINARA isebenzisa imali yayo okusemthethweni ngoba imali yonke abayitholayo iya kumakhansili emadolobheni lasemaphandleni.
Ebuzwa zintathelizindaba ngokukhwela kwemithelo yentuba zama-tollgates emigwagqweni emikhulu, uNcube uthe lanxa abantu bekhonona, lokhu kuzanceda iZINARA ukuba ithole imali yokulungisa imigwaqo.
Kodwa umsekeli kasodolobho wakoBulawayo uMnu Edwin Ndlovu uthi kavumelani lokukhulunywe yiZINARA, esithi udubo olukhona elizweni yikuba imali bayiphiwa ilidola leZimbabwe lona eligugudeka isisindo mihla ngemihla.
Inhlanganiso ezilwela amalungela kazulu zithi kumele amakhansili aphiwe imali yokulungisa imigwaqo isuka ebantwini hatshi ukuba lokhu kwenziwe yiZINARA.
Okhokhela inhlanganiso yeHarare Residents Trust uMnu Marvelous Khumalo uthi kumele uhulumende anikeze amakhansili amandla okulungisa imigwaqo.
Emhlanganweni wanamhla i-ZINARA yazise ukuba izama ukulwisana lenkohlakalo isebenza leZimbabwe Anti-Corruption Commission ukuze yonke imali abayitholayo emigwaqweni iye ekulungisweni kwemigwaqo.
I-ZINARA yazise ukuthi kulezimota ezedlula isigidi, 1.2 million eZimbabwe, kodwa ezibhadala imithelo zingu-800 000 kuphela. Ngenyanga lolugatsha luthi luthola imali engangeUS$ 3 million ebhadalwa ngabatshayeli bezimota njengemithelo, kodwa luthi isilingaliso esikhulu salimali sibhadalwa ngedola lakuleli.
IZINARA income kakhulu amakhansili athi eyeKariba, eyeNorton, eyeChipinge leyeZibagwa ngokusebenzisa imali ewapha yona ukulungisa umgwaqo ngemfanelo.
Imigwaqo eminengi elizweni isingamagodigodi, inengi lisola ZINARA ngokwehluleka ukupha amakhinsili imali abanye besithi umlandu wokulungisa imigwaqo ngabe uyaphiwa amakhansili njengalokho okwakukhona kudala.
Kulonye udaba, idale leHigh Court namhlanje libeke eceleni isigwebo esaphiwa owake waba lilunga lephalamende e Mount Pleasant uNkosana Fadzai Mahere.
UMahere watholwa ngu Mantshi uMnu Taurai Manuwere elecala lokuqamba amanga esebenzisa inkundla ye Facebook.
Idale le High court lithe icala leli alingeke letheswe umuntu ngoba liphambana lisisekelo sombuso welizwe.
Forum